Јужноафриканскиот претседател Сирил Рамафоса нема да поднесе оставка и покрај скандалот околу украдените пари од неговата фарма, изјави неговиот портпарол, а пренесе Би Би Си. Во центарот на спорот се тврдењата дека тој чувал големи суми пари од непознато потекло на својот имот, а потоа ја прикрил кражбата на парите.
Истражната комисија, во која членуваат група правни експерти, заклучи дека претседателот мора да одговара за тој случај. Највисоките тела на Африканскиот национален конгрес (АНЦ) треба да се состанат денеска и утре за да одлучат за следните чекори на партијата.
Портпаролот на претседателот Рамафоса, Винсент Магвенја истакна дека тој ќе продолжи да се бори и дека наместо да се повлече, ќе бара втор мандат како лидер на партијата Африкански национален конгрес.
Претседателот Рамафоса не поднесува оставка врз основа на неточен извештај, ниту се повлекува настрана. Во долгорочен интерес на нашата уставна демократија, далеку од претседателскиот мандат на Рамафоса, е да се оспори таков погрешен извештај, рече портпаролот.
Скандалот избувна во јуни, кога поранешниот шеф на јужноафриканската шпионска служба, Артур Фрејзер, поднесе пријава во полиција, обвинувајќи го претседателот за прикривање кражба на 4 милиони долари во готовина од неговата фарма за дивеч во 2020 година. Според медиумите, парите биле скриени во перничињата на каучот.
Јужноафриканскиот претседател тврдеше дека не биле четири милиони, туку половина милион долари, и дека парите ги заработил продавајќи 20 биволи на судански купувач. Бидејќи истражната комисија не му влегла во трага на купувачот, а биволите се уште се наоѓаат на фармата и никој не ги земал, се појавија сомнежи за вистинитоста на тврдењата на претседателот за деловната трансакција.
Медиумите пренесуваат и дека шефот на државата го организирал киднапирањето на крадците и ги поткупил да молчат.