Во просториите на Туристички сојуз во Скопје се одржа изложбата насловена „Каде се сите?“ на иницијативата „Кооперација“. Преку 15тина инсталации, апликации, колажи, принтови, цртежи и видеа, „Каде се сите?“ се занимаваше со релацијата помеѓу уметноста и политичкот дискурс.
Изложените дела стоеја како аргумент на тврдењето дека уметноста, без разлика дали отворено и директно, или индиректно ги тематизира политичките процеси, е и останува форма на политички дискурс и дејствување.
Групната изложба на иницијатива на уметничката формација Кооперација е една од ретките во Македонија, а можеби и единствената во последните години, која си го постави предизвикот да го тематизира влијанието на политиката и политичкото во уметноста.
Изложбата се одржа во простории без струја, траеше неколку часа и беше самофинансирана од учесницте, наспроти претставувањето во некоја од културните институции, за кои, еден од авторите вели: “културните институции во Македонија станаа орган за манипулација во политиката“.
Учесници на изложбата беа уметниците: Дијана Томиќ Радевска, Мирна Арсовска, Христина Иваноска, Ивана Драгшиќ, Александар Спасоски, Оливер Мусовиќ, Игор Сековски, Борис Шемов, Симон Узуновски, Игор Тошевски, ОПА, Ѓорѓе Јовановиќ, Никола Узуновски, Филип Јовановски и Владимир Јанчевски.
Во рамки на проектот, се одржа и јавна дебата на тема “Уметност и/или политика: Двојното кодирање како предизвик или парадокс?”
Во македонскиот контекст, каде уметноста често се третира како пропагандна машина, уметниците од проектот „Каде се сите?“ се обидоа критички да проговорат за различните аспекти на влијанието на политиката врз уметноста и клтурата што ја живееме денес и овде.