Ана Камчева, сопругата на бизнисменот Орце Камчев, во денешното сведочење за случајот „Рекет“ призна дека поранешната специјалната обвинителка Катица Јанева никогаш лично не побарала пари. Исто така истакна и дека Јанева никогаш не била присутна кога се предавале парите.
Сепак, како што појасни, рекетот одел преку Бојан Јовановски. Таа додаде дека Јанева се јавувала на нејзиниот сопруг Орце Камчев додека беше во домашен притвор за „Империја“ и го убедувала „дека се ќе биде ОК“.
Потоа следуваа и прашања од Бојан Јовановски до Ана Камчева. Првообвинетиот во случајот „Рекет“ почна да ја прашува за содржината на разговорите од нивните средби и што наводно таа му зборувала за, како што рече „ценетиот и сакан сопруг, за неговата сестра и за свекрвата“.
На тоа доби опомена од судијката за изнесените квалификации. Не доби одговор од сведокот ниту на прашањето „на чие барање се појавил во домот на Камчеви“ што го нарече „велелепна палата“, како и „дали ги познава пријателите на Камчев од Бугарија“ кои ги опиша како „куќни пријатели“.
Јовановски продолжи да ја прашува Камчева „колку пати го посетила во Систина“ за време на двете хируршки интервенции за стеснување на желудникот, но и на колку места се обратила за вадење на нејзиниот сопруг од притвор, покрај адвокатот Васил Димишков. Сведокот, во однос на првото прашање, рече „отприлика двапати“, а на второто не даде одговор.
Првообвинетиот во случајот „Рекет“ го праша сведокот „дали се сеќава какви подароци му давале“ на што се вмеша обвинителката Вилма Русковска која се обрати со зборовите „зарем се малку милион и пол евра, па треба да зборуваме за дополнителни подароци“. Јовановски и возврати дека „тие милион и пол евра се измислени во вашата глава“ што беше причина за нова опомена од судијката Васка Николовска Масевска за почитување на редот во судницата.
Јовановски изрази извинување доколку отстапил од законското однесување и рече дека е под дејство на седативи „што го правеле своето“.