Доколку Европската унија не спроведе длабоки реформи, Британија би можела да излезе од членството, порача британскиот премиер Дејвид Камерон.
Говорот на Камерон беше пропратен со остри реакции од Брисел.
Британскиот премиер Дејвид Камерон, вети дека доколку на наредните избори во 2015 година победат неговите конзервативци, ќе биде свикан референдум до 2017, за излегување на земјата од ЕУ.
Камерон порача дека Британија не сака да постави мост помеѓу Островот и континентот, ниту да се повлече од светот, но јавноста да се освести по прашањето за ЕУ.
“Време е британскиот народ да го каже своето мислење. Време е да го решиме прашањето Британија – Европа” – рече Камерон
Резултатите од неодамнешните анкети покажаа дека Британците се за излегување од ЕУ, бидејќи сметаат дека Брисел се меша во внатрешните прашања на земјата, и се расфрлаат со пари во време кога треба да се воведат мерки за штедење
Бројни европски лидери и функционери преку Твитер остро ја критикуваа идејата на Камерон.
“Не треба Британија да не гледа надмено, туку како полноправен член”, напиша претседателот на Европскиот парламент Мартин Шулц.
Шведскиот министер за надворешни работи Карл Билт, се надоврза со зборовите “едно е да се биде флексибилен, а друго е да се бара ЕУ со 28 брзини. Тоа не би било ЕУ, туку хаос”, објави Билт на својот Твитер профил.
На реакциите се приклучи и неговиот француски колега Лорен Фабијис, кој го предупреди Камерон дека “ЕУ не е мени од кое секој нарачува она што го сака.”
Американсиот претседател Барак Обама, минатата недела нагласи дека “САД поддржува цврста Велика Британија во цврста Европска унија.”
Лидерот на Лабуристичката партија Ед Милибанд пред говорот на Камерон рече дека тоа ќе го дефинира како слаб премиер, понесен од неговата партија, а не од националните економски интереси. „Единствената работа која е променета од минатиот референдум во Октомври 2011, е губењето на неговата контрола врз партијата, и е премногу слаб да работи за доброто на нацијата”, порача Милибанд.