Како што најави британскиот премиер Дејвид Камерон вчера, објави извештај за исплата на своите даночни обврски кон државата, по барањата на медиумите и опозицијата, поради документите од Панама.
Камерон е првиот премиер историјата на Велика Британија кој објавува детали за тоа кога и како платил данок, како и на колку од основиците за плаќање на данокот бил ослободен.
Неговиот извештај е за период од 2009 до 2015 година и според нив, тој добил 200.000 фунти подарок од својата мајка по смртта на неговиот татко.
Последните шест години тој заработил над 1 милион фунти а платил околу 400.000 во данок. Минатата година платил 76.000 фунти данок за профит од 200.000 фунти.
Опозициските лабуристи продолжуваат да бараат од Камерон дополнителни податоци околу имотната листа и платените даноци.
Британскиот премиер најпрво ги отфрли обвинувањата дека профитирал преку оф шор компанијата на татко му во Панама а дополнителна конфузија во јавноста внесоа различните изјави од 10 Даунинг стрит во краток период.
Политичките противници на Камерон сметаат дека не се доволни објаснувањата, како и потврдите што ги дава 10 Даунинг стрит дека акциите биле продадени во јануари 2010 година, како и дека ги има платено даноците на британската Управа за приходи.