Ќамил Ибраими е новиот директор на Агенцијата за лекови. Тој во средата официјално ја презема раководната функција, откако на владина седница беше разрешен претходниот директор Роберт Бекироски. Ибраими е кадар на БЕСА, по партиските преговори за проширување владината коалиција со што ова место и припадна на оваа партија.
Ибраими е фармацевт и професор на Универзитетот во Тетово. Во неговата биографија нема многу податоци за неговата професионална кариера. Тој е доцент на ДТУ по фармација. Докторирал во Тирана на Факултетот за медицински и технички науки на тема „Фармакокинетика и динамика на кардиалните гликозиди во срцевата инсуфициенција“.
Своето работно искуство го градел како управител на неколку аптеки и во претставништвото на една странска компанија.
Засега, нема официјални информации на која работна позиција ќе биде распределен претходниот директор Роберт Бекироски, кадар на СДСМ.
Неофицијално, за него се подготвуваат измените на Законот за лекови со цел да се отвори законска можност за именување на заменик директор во Агенцијата за лекови.
Како што веќе објави НОВА подносител на барањето за измени на законската регулатива е Министерството з а здравство.
Предлог -законот за изменување и дополнување на лекови и медицински помагала во средината на минатиот месец беше објавен на Енер на Влада, алатка преку која преку доставување предлози, мислења и забелешки можат навремено да се вклучат засегнатите страни во креирањето на регулативата, но се уште не поминал во Собрание.
Во Предлог законот стои дека “од досегашното искуство во примената на Законот во делот на работата на директорот и функционирањето на Агенцијата се констатира дека, заради непостоење на заменик, во случај на отсуство на директорот, се јавува проблем во ефикасното вршење на работите“.
Сепак, Законот за лекови во член. 4, стои дека во отсуство на директорот, тој заменик бира од редот на вработените.