Серијата тврдења за сексуални напади и несоодветно однесување, од кои едно е на 10 годишно девојче, предизвикаа хаос во кампањата на републиканскиот кандидат за претседател на САД Доналд Трамп, на помалку од месец од претседателските избори.
Обвинувањата на сметка на Трамп се појавија како лавина откако тој негираше дека несоодветно се однесувал со жените, покрај објавените снимки на кои тој ги нарекува со погрдни зборови.
До вчеравечер, како што објавува британскиот весник Гардиан на листата на жени кои биле мета на таквото безобразно однесување на мултимилионерот се најдоа:
-две натреварувачки за Мис САД, кои тврдат дека Трамп им влегол во собите додека биле голи,
-две жени кои тврдат дека Трамп ги бакнал без нивна согласност, од кои едната во авион
-жена која тврди дека Трамп сексуално ја нападнал за време на настан во Флорида,
-репортерка на магазинот Пипл која тврди дека Трамп и се нафрлил кусо откако го направила интервјуто со него и со неговата сопруга во 2005 година
-инцидент во кој Трамп наводно сексуално нападнал 10 годишно девојче за време на емисија која се снимала во Трамп Тауер.
Од кампањата на Трамп засега не одговориле на барањата на Гардијан да ги коментира овие обвинувања, додека Републиканската партија одбила да го направи тоа.
Трамп засега најави дека ќе го тужи Њујорк Тајмс кој објави тврдења на две жени дека биле сексулано нападнати од него.
Ваквата ситуација веднаш ја искористи Штабот на противкандидатката на Трамп, Хилари Клинтон. Портпаролката на кампањата Џенифер Палмиери во писмена изјава вели:
-Оваа тажна приказна само се вклопува во она што веќе го знаеме за тоа како Доналд Трамп се однесува кон жените, вели Палмиери. „Овие извештаи укажуваат дека тој лажел во дебатата и дека одвратното однесување што го слушнавме на видеото не се само зборови“, рече Палмиери.




