Поранешната министерка за култура Елизабета Канчевска Милевска по рочиштето за случајот “Тендери” негираше дека се пазарела со власта и дека гласала за уставните измени за да издејствува измени во Кривичниот законик и да се спаси од обвинение.
„За ова се што ви говорам можете да ја потврдите информацијата и до премиерот да се обратите, да видите дека ова што ви го говорам е точно така. Значи ниту сум барала нешто да ми се реши, ниту пак сум уцената од негова страна, ниту пак јас сум уценила некој друг во однос на сето ова. Така да сево ова може да го проверите и да се уверите во ова што ви го велам“, рече Елизабета Канческа – Милевска.
Таа додаде дека гласала за уставните амандмани откако направила сериозна анализа за иднината на државата.
„Не би си дозволила никој да ме уцени ниту пак јас да уценам некого во однос на нешто што го сметам највисок државен интерес. Секој што ме познава знае дека одлуки носам врз основа на сериозна анализа на состојбите, поготово во моментов една сериозна анализа за она што и е непходно на државата да продолжи напред и да се вклучиме во нешто што има национален консензус во нашата држава, а тоа е интеграцијата во НАТО и ЕУ“ рече Елизабета Канческа Милевска – обвинета во случајот “Тендери”.
Случајот Тендери продолжи со изведување на докази. Денеска беа сослушани двајца сведоци по предлог на обвинителството, кои во 2011 година биле вработени во Јавното станбено претпријатие за стопанисување со станбен и деловен простор. Следното рочиште за овој предмет е закажано за 25ти јануари.
Во случајот „Тендери“ првообвинета е поранешната министерка за култура Елизабета Канческа Милевска за тендерот за извршување градежни работи во Музејот на македонската борба за државност и самостојност од проектот „Скопје 2014“.
Според обвиниението, дел од градежните работи во Музејот се вршени во корист на правното лице „Бетон“ од Штип. Пред да се објави оглас за доделување договор за јавна набавка и пред да се спроведе постапката, спротивно на Законот за јавните набавки, Канческа-Милевска преку разговори со генералниот директор на градежното претпријатие „Бетон“ од Штип наложила да се продолжи со работа на Музејот, каде што се изведувале градежни работи по претходно склучен договор за јавна набавка.