Ново видео излезе во јавноста на кое заложникот на Исламската држава Џон Кантли предупредува дека „битката за сириската граница се ближи кон крајот“.
Во пет-минутното обраќање на Британецот Кантли, тој нагласува дека „се ближи крајот“.
Последните снимки од градот Кобани веќе видно покажуваат колку градот претрпел штета од борбите кои се водат помеѓу џихадистите и Меѓународната коалиција предводена од САД.
– Веќе еден месец војниците на ИД навлегуваат во клучниот курдски град. И покрај американските воздушни напади за кои се потрошени милијарди долари, муџахедините се длабоко во градот. Го контролираат источниот и јужниот дел, наведува во видеото британскиот заложник.
Тој потенцира дека муџахедините се движат бавно но сигурно и заземаат „улица по улица, зграда по зграда“.
Во почетокот на месец октомври, Обединетите нации предупредија дека доколку Кобани падне во рацете на Исламската држава, тоа ќе биде катастрофа за човештвото.
Турција пак, кој не сака да се приклучи во нападите на Коалицијата на САД, во понеделникот соопшти дека Курдите имаат дозвола да се движат од Турција во Сирија, и покрај тоа што за нив курдските борци се со особина на терористичка органзација.