Жалбениот совет на Механизмот за кривични судови во Хаг му изрече доживотна казна затвор на бившиот претседател на Република Српска Радован Караџиќ, за злосторства против човештвото, кршење на законите и обичаите на војување во Босна и Херцеговина.
Се работи за второстепена пресуда. Со првостепената Караџиќ во 2016 година беше осуден на 40 години затвор. Жалбениот совет смета дека казната од 40 години е неадекватна со тежината на кривичните дела на Караџиќ, како и дека казната на претресниот совет е неразумна и неправична.
Жалбениот совет делумно прифати само една од жалбите на Караџиќ на пресудата, а ги одби сите останати, меѓу кои и за неговата одговорност за „масакрот во Сараево“, „тероризирање на Сараевчани“, за злосторства во 20 босански населени места, како за „неправично судење“.
Жалбениот совет ја потврди намерата на Караџиќ да учествува во здружен злосторнички потфат за злосторствата во Сараево.
Жалбениот совет укажа дека Караџиќ не покажал дека постои грешка во делот на првостепената пресуда која се однесува на намерата да се стори геноцид во Сребреница и дека знаел за злострствата во Кравица.
Исто така Жалбениот совет не нашол грешка во заклучокот на провстепената пресуда во врска со прогонот на Бошњаците од подрачјето на Сребреница. Судијата рече дека одбраната на Караџиќ не успеала да докаже дека не постоела намера за геноцид.
Караџиќ беше уапсен во Белград на 21 јули 2008 година, а девет дена подоцна беше екстрадиран во Хаг. Тој долги години се криеше во Србија под лажен идентитет Драган Дабиќ, доктор по алтернативна медицина.
Неговото судење започна во октомври 2009 година и заврши со првостепена пресуда во март 2016 година.




