За седум месеци, колку што сум во Хрватска, посетив 20 градови со цел да се онбоват економските односи во интерес и на Македонија и на Хрватска. Постои голем интерес во хрватските компании во Македонија, и обратно, македонската економија сака да влезе на хрватскиот пазар, кој наскоро ќе стане дел од пазарот на ЕУ. Нашите два народи имаат долга традиција на пријателство, која треба да се продлабочи со посилна соработка во областа на економијата и туризмот – изјави амбасадорката на Македонија во Хрватска, Даниела Караѓозоска, за време на посетата на темошната општина Решетари, која се побратими со нашата Општина Илинден, пренесува тамошното RadioNG.org .
Како што домаќините можеле да дознаат од разговорот со амбасадорката Караѓозоска, Македонија брзо се извлекувала од економската депресија, за само неколку години бројот на невработени паднал од наследените 300.000 на околу 100.000 луѓе, јасно се одвоени давачките за социјална помош (30 евра месечно) од платата која се добива од работа и со тоа за поранешните корисници на социјална помош работата станала попожелен извор на приходи. Со новата политика за наталитет политика за секое 3, 4 или 5 дете мајките имаат трајни приходи во форма на плати и доживотни пензии, зголемени се странските инвестиции, а за домашните стоки Македонија бара пазари преку развој на силни економски врски со соседите и ЕУ.
Амбасадорката во Решетари ја посети локалната галерија, фабриката за кожи и спомен обележјето на Тоше Проески.
Инаку, како што е познато, бројот на невработени во земјава никако не паднал од 300 на 100 илјади, туку државата ги отежна условите потребни за пријавување како невработен и ги подели невработените во две групи. А, кога станува збор за странските инвестиции, пак, тие во првите три месеци годинава паднаа 34 отсто, а лани паднаа три пати во однос на преклани – завршија на ниво од 104,8 милиони евра во 2012 за разлика износот 336,8 милиони евра во 2011 година.