Поранешната специјална обвинителка Катица Јанева поднела приватна тужба против Бојан Јовановски за неовластено снимање без нејзино знаење. Ова е обелоденето на денешното рочиште за случајот „Рекет“ што продолжи со изнесување на докази на одбраната. Снимката со мобилен телефон била направена во нејзиниот дом со пари на масичка пред Јанева.

„Приватната кривична тужба е поднесена на 13 март 2020, заради неовластено снимање. Досега судот уште нема преземени дејства, рече Ирена Фрчковска, бранител на Јанева.

Според адвокатите на Јанева се работи за фотографијата која претходно била изведена како доказ, а на која се гледа како таа седи на тросед и пред неа, според обвинението, има купче од 50.000 евра. Судот воедно одби и дел од доказите доставени од страна на обвинетата Катица Јанева, меѓу кои и пет снимки од јутјуб, како и документи од предистражна постапка со образложение дека нивното откривање ќе направи поголема штета од доказна вредност. Но, извод од сметката на Константин Делкиџаков (татко на Јанева) прифати да биде презентиран како доказ.

„Мобилниот телефон на Јовановски воопшто не е вештачен. Вешто лице од МВР извадил само три слики со Јанева, се сомневаме дека тоа е по налог на Русковска“, се побуни адвокатот на Јовановски, Сашо Дуковски.

Кривичниот суд во Скопје не го прифати предлогот на првообвинетиот во предметот „Рекет“, Бојан Јовановски-Боки 13, во дополнение на доказната постапка, како сведок да биде сослушан Горан Николовски, поранешен директор на некогашната Управа за безбедност и контраразузнавање (УБК). И на таквата одлука следуваше реакција од Дуковски кој рече дека во овој случај се прифатени многу понерелевантни сведоци, како на пример сведокот Христијан Баневски.

„Ако сведокот Горан Николовски не е битен да биде сослушан во овој предмет, тогаш не знам кој сведок е битен да биде сослушан“, истакна адвокатот Дуковски.

Следното рочиште во случајот „Рекет“ е закажено за 7 мај, кога обвинетиот Бојан Јовановски-Боки 13 ќе треба да ја даде својата одбрана.

Во досегашниот процес за случајот „Рекет”, се презентираа разни материјални докази и сведоци. Судењето почна на 3 декември минатата година. На првото рочиште третообвинетиот Зоран Милевски-Кичеец ја прифати вината и ден подоцна беше осуден на тригодишна затворска казна. Пред неколку недели нему му беше укинат куќниот притвор од лични причини и одлуката по жалбата на Апелација ќе ја дочека на слобода.

Обвинителство за борба против организираниот криминал и корупција во случајот „Рекет“ ги товари Јовановски и Јанева дека со умисла го рекетирале бизнисменот Јордан Камчев (обвинет во предметот „Империја“) за да му се укине мерката притвор во наведениот предмет.