Амбасадорот на Словенија во НАТО, Јелко Кацин во Брисел порача дека само од граѓаните во Македонија зависи дали земјата ќе стане членка на Алијансата.
– Одлуката во Грција е веќе усвоена, условите се на ваша страна, штом ги исполните условите очекуваме позитивен сигнал од Атина, да не добиевме позитивна порака генералниот секретар денеска немаше да може да го потпише документот и да започне пристапни преговори, рече Јелко Кацин.
Членството на Македонија ќе следи откако на референдум ќе поминат уставните измени предвидени во Договорот со Грција.
Без тие уставни измени, Македонија не може да стане членка, но поканата не може да биде повлечена, прецизираше словенечкиот амбасадор, јави МИА од Брисел.
– Одлучени сме да и пружиме прилика на Македонија и ќе направиме сѐ што е во наша можност да им помогнеме на граѓаните да го разберат историскиот момент после сите тие долги години блокада. На Македонија е да одлучи дали прифаќа компромис, во согласност со тој компромис да го пополни својот Устав за веќе на почетокот од следната година вашите министри да можат да бидат со нас состаноците на НАТО, рече Кацин.
Македонија штом ги заврши преговорите за членство, кои обично не траат повеќе од неколку месеци, ќе може да биде присутна на сите состаноци на Северноатлантскиот совет на НАТО но без право на глас, се додека не се исполни Договорот со Грција.