Пратениците на ВМРО-ДПМНЕ сè уште не донеле конечна одлука дали утре ќе присуствуваат на средбата во Маврово на која се очекува да биде отворено прашањето за измени во собранискиот Деловник, вели Никола Мицевски, координатор на пратеничката група на опозициската партија.

Таа одлука, како што ни изјави Мицевски, пратениците ќе ја донесат попладнево.

На нашето прашање дали, ако сепак одлуката биде да не ја прифатат поканата на собранискиот претседател Талат Џафери, владејачкото мнозинство ќе се договори за измени во одредбите на Деловникот со кој се  уредуваат организацијата и функционирањето на парламентот и на работните тела на Собранието и во отсуство на опозицијата, Мицевски вели дека такво нешто не е можно.

– Ако зборуваме за парламентарна демократија, тогаш не е можно да се договараат измени на Деловникот без наше присуство, сепак да почекаме попладнево, па ќе ја соопштиме нашата одлука, рече координаторот на пратеничката група на ВМРО-ДПМНЕ.

Пратеничките прашања, употребата на европското знаменце, блокирањето на комисиските расправи често пати се камен на сопнување за непреченото функционирање на Собранието, па оттаму пратениците се договорија да седнат во Маврово и да се договорат какви измени да направат за да нема непотребни расправии и губење време околу сите овие отворени прашања. Таков договор беше направен пред најавите на ВМРО-ДПМНЕ за блокада на Собранието.

За утрешната средба во Маврово која била договорена пред два месеца, а се направени и резервации од кабинетот на претседателот на парламентот Талат Џафери кој денеска е во Тирана на конференција на претседателите на парламентите на Јадранско-јонската иницијатива, велат дека таа ќе се одржи. Во агендата е предвидено да се разгледува последниот предлог Деловник по одржаниот Трет дијалог „Жан Моне“ во Собранието. На оваа средба, како што информираат од кабинетот на Џафери, ќе присуствува и потпретседателот на Собранието Горан Мисовски и координаторите на пратеничките групи.

– Усогласениот предлог потоа, на следниот „Жан Моне“ дијалог ќе се разгледува во полн состав на работната група и европратениците, велат од кабинетот на Џафери.

ВМРО-ДПМНЕ, најави дека од 10 мај ќе го блокира Собранието, ако власта не го прифати предлогот за лидерска средба за датум за предвремени избори, а денеска добија поддршка и од лидерот на движењето Беса, Билал Касами. Тој изјави дека двајцата пратеници од Беса ќе `и се придружат на ВМРО-ДПМНЕ затоа што сметаат дека се неопходни предвремени парламентарни избори за да излезе државата од кризата и лошите политики на власта.

Инаку, вакви средби во рамки на процесот „Жан Моне“ за Деловникот претходно се одржаа во Охрид и во Скопје. (С.М.)