Изминуваат 15-те дена кои Општина Карпош им ги даде на верниците во Злокуќани сами да ја урнат бесправната градба на џамиското минаре. Подготовките се во тек, изјави за НоваТВ секретарот на скопското муфтивство Неџми Ферати.
– Имавме средба со џамискиот одбор и се договоривме да се урне минарето бидејќи е правено без дозвола за градба. Се сретнавме и со верниците им кажавме и се договоривме да нема тензии и да се урне минарето, изјави Ферати за НоваТВ.
Пред неполн месец мештаните на Злокуќани алармираа дека во нивното соседство буквално, како што изјавуваа, преку ноќ се издигнало минаре и дека тоа нема да го дозволат дотолку повеќе што верниците кои го посетуваат и се населени околу објектот, за греење употребуваат неконвенционални материјали од гуми до стар паркет кои пуштаат отровни материи во воздухот од што ги печело во очите и грлото.
По овој аларм од мештаните, на терен излегоа од урбанистичкиот инспекторат на Општина Карпош, при што утврдија дека општината не им издала дозвола за градба на минарето, по што им беше издадено решение сами да го срушат бесправниот објект во рок од 15 дена и дека доколку не се случи тоа, ќе го известат државниот инспекторат за градежништво.
Што се однесува пак за џамијата во Средно Нерези, секретарот на скопското муфтивство Ферати во разговорот за НоваТВ не сакаше да зборува ништо.
– Сега зборуваме за минарето во Злокуќани, ни рече Ферати во телефонскиот разговор.
Инаку од инспекторатот на Општина Карпош неодамна известија дека постапката за рушење на објектот во Средно Нерези е започната уште во јуни минатата година и дека веќе било издадено решение за отстранување на градбата.
– Општината Карпош треба да го урне објектот. Имаме Годишен план за отстранување на бесправно изградени објекти, кога според тој план ќе ѝ дојде редот и на оваа градба и таа ќе се урне, информираа од Инспекторатот на Општина Карпош.
(М.Т.)