Комисијата за заразни болести ја разгледува можноста за укинување на ковид сертификатите за влез во моловите.
Комисијата за заразни болести ја разгледува можноста за укинување на сертификатите за влез во моловите, која беше донесена во август минатата година. Како што дознава НоваТВ од извори во Комисијата, на денешниот состанок се водела бурна дебата околу оваа тема.
Како што дознаваме, членовите на Комисијата, која од неодамна работи во проширен состав, ги разгледувале аргументите „за“ и „против“ ваквата одлука. Конечниот заклучок бил дека најверојатно, Комисијата наскоро ќе достави ваква препорака до Министерството за здравство, Кризниот штаб и Владата.
Граѓански здруженија и група граѓани преку социјалните мрежи се организираат во сабота да излезат на мирен протест против мерката за задолжителен сертификат за влез во моловите и угостителските објекти, бидејќи сметаат дека со појавата на сојот омикрон, кој полесно и побрзо се шири, мерката е неиздржана и не дава ефект.
Минатата недела, на состанокот на Комисијата за заразни болести беше донесена одлука до Владата да се препорача укинување на мерките за излез од државата, односно неопходниот негативен ПЦР тест или потврда за вакцинација или прележан вирус. Истовремено беше договорено да се препорача укинување на мерката бремените жени да бидат ослободени од работа.
„Според членовите на Комисијата во моментов е безбедно за бремените жени да се вратат на работа, но со препорака тие да се вакцинираат против Ковид- 19 бидејќи вакцината е безбедна“, рече портпаролот на Комисијата, доктор Злате Мехмедовиќ, веднаш по минатонеделникот состанок.
Комисијата за заразни болести на еден од последните состаноци исто така препорача сетрификатот за прележан Ковид-19, наместо 45 дена да трае 180 дена.
Овие препораки се уште чекаат одобрување од Владата.
(Б.Божиновска)