Управата ја извршување на санкции ја информира јавноста дека осуденото лице Зоран Милески – Кичеец е преместено од отворено во полуотвореното одделение во Затворот Струга.
– Тоа значи дека тој повеќе нема да може да ги користи олеснувањата кои ги добиваат сите осудени лица во отворените одделенија. Причина за ваквата одлука е новата кривична постапка која се води против Милески. Со ова решение, тој ќе продолжи да ја издржува затворската казна и ќе биде достапен за истражните органи, соопштија денеска од Управата за извршување на санкции.
Како што претходно објавивме, Кичеец е осомничен за тешки дела против безбедноста на луѓето и имотот во сообраќајот, откако во саботата, на 4 септември, според обвинителството, предизвика сообраќајна несреќа на патот Гостивар – Кичево во која едно лице загина, а седум други беа повредени. ОЈО Гостивар наведе дека Кичеец претекнал на две полни линии и се судрил со две возила.
Трансферот на Кичеец од Скопје до Гостивар следи откако кривичен совет на гостиварскиот суд по негова жалба го укина 30 дневниот притвор, кој траеше само три дена. Претходно, притворот му беше одреден поради тешката сообраќајна несреќа која се случи во саботата на патот Гостивар – Кичево во близина на Ново Село кај Стража. Според обвинителството, токму Кичеец ја предизвикал несреќата во која загина едно лице. Во тој момент Кичеец имаше прекин во издржување на казната до 9 септември, а причина за тоа беше негово лекување.