Зградата на градското собрание во Киев која беше окупирана повеќе од два месеца ја напуштија демонстрантите.
Украинското обвинителство соопшти дека денеска треба да започне имплементацијата на законот со кој ќе се ослободат демонстрантите од кривично гонење.
Министерството за внатрешни работи потврдило дека демонстрантите го исполниле бараниот услов да го напуштат градското собрание што значи дека законот може да стапи на сила. Дел од демонстрантите се незадоволни од ваквиот потег и изјавуваат дека ја изгубиле револуцијата.
Двајцата опозициски лидери од Украина за денеска планираат нов политички потег, и тоа во Германија. Витали Кличко и Арсени Јаценјук ќе бидат примени во Берлин од канцеларката Ангела Меркел. Нивната намера е да замолат за поддршка од ЕУ, како што најави Јаценјук.
Опозицијата останува на барањата – одржувањето предвремени избори и донесување нов устав, кој ќе ги укине ингеренциите кои во последните години си ги присвои претседателот, и повторно поголеми права во одлучувањето ќе им се даде на пратениците.
Претседателот Виктор Јанукович засега не отстапува. Ситуацијата во Киев може повторно многу брзо да се заостри.