Кина денес истакна дека плановите на САД да ја зацврстат ракетната одбрана како одговор на провокациите од Северна Кореја, само ќе го интензивира непријателството и побара од Вашингтон да дејствува претпазливо.
„Анти-ракетното прашање има директно влијание врз глобалната и регионалната рамнотежа и стабилност. Исто така се однесува на заедничките стратегиски интереси меѓу земјите“, изјави портпаролот на кинеското Министерство за надворешни работи, Хонг Леи.
Американскиот секретар за одбрана, Чак Хегел, во петокот го објави планот за зајакнување на ракетната одбрана, како одговор на „неодговорните и непромислени провокации“ од страна на Северна Кореја, која се закани со превентивен нуклеарен напад врз САД.
Според Хонг, ставовите на Кина се дека, напорите да се зголеми безбедноста и да се реши проблемот со ширењето на нуклеарното оружје, најдобро би се постигнале преку дипломатски средства.
„Кина се надева дека САД ќе продолжи со основната политика на мир и стабилност, и дека ќе приспособи одговорен однос и ќе делува разумно“, додава Леи.
Пентагон претходно изјави дека САД ја информирала Кина, соседот на Северна Кореја и најблизок соработник, за својата одлука да го засили ракетниот штит, но одби да ја толкува реакцијата на официјален Пекинг.