Дополнителниот заменик министер за информатичко општество и администрација Александар Кирацовски денеска објави дека ВМРО-ДПМНЕ и ДУИ сами составиле тимови кои треба да ги внесат податоците од теренската проверка на Избирачкиот список, во специјална електронска евиденција за потребите на Државната изборна комисија.
– Министерката Арсовска Томовска и државниот секретар Јахи Јахија, на своја рака и без да ја запазат процедурата на врзан потпис, испратиле лица вработени во Министерството, кои тие самите ги избрале, да го вршат внесувањето на податоците.
Ова е спротивно на Договорот од Пржино и спротивно на Законот за Влада, рече Кирацовски.
Тој презентираше писмо од ДИК до министерката Арсовска Томовска, до него како дополнителен заменик министер и до државниот секретар Јахија, со кое, како што рече, ДИК во петокот побарала кадри од МИОА за внесување на податоците од теренската проверка во 8 подрачни одделенија во Скопје и државата.
– Арсовска Томовска и Јахи Јахија сами ги составиле тимовите. Спорно е и тоа што ДИК официјално изразува потреба од само 36 лица за 8 општини, а испратени се над 100 лица во скоро сите општински изборни комисии, истакна Кирацовски.
– Со цел да спречам евентуални малверзации, а и да ги поштедам вработените од МИОА од непријатната ситуација во којашто ги ставија Арсовска Томовска и Јахија, барам повлекување на тимовите составени во координација ВМРО-ДПМНЕ – ДУИ. Инсистирам на двојна контрола при внесувањето на податоците поради што ќе побарам итен состанок со министерката и државниот секретар.
Укажувам на ДИК дека испратените тимови не се составени според обврската од Договорот од Пржино, списокот нема мој потпис, поради што барам на овие тимови да не им биде дозволено внесување на податоците од теренската проверка додека не се обезбеди побараната двојна контрола, рече Кирацовски.