Во последните 48 часа, Русија продолжи со интензивни воздушни напади врз Украина, комбинирајќи масовни бранови дронови со ракетни удари, додека на дипломатско ниво се отвори нова контроверзија околу рускиот предлог за краткорочен прекин на огнот поврзан со парадата во Москва на 9-ти мај.
Најголемиот напад беше изведен во ноќта меѓу 29. и 30. април. Според украинските воздухопловни сили, Русија лансирала една балистички ракети, вклучително и Искандер-М и 207 дронови од различни типови, меѓу кои Shahed, Gerbera, Italmas и други. Украинската противвоздушна одбрана соборила или неутрализирала 172 дронови, но биле регистрирани погодоци од балистичката ракета и од 32 ударни дронови на 22 локации, според извештајот од Воздушните сили на Украина (Повітряні Сили Збройних Сил України).
Ова се совпаѓа со објавата на украинската амбасадорка во Северна Македонија, Лариса Дир, која на платформата X објави дека во текот на ноќта Русија употребила над 200 дронови и ракети против различни региони на Украина. Нејзината порака ја нагласува токму суштината на нападот: не станува збор за изолиран воен удар, туку за масовен терор врз целата земја.
Во ноќта помеѓу 29. и 30. април најтешко погодена беше Одеса, каде што руските дронови предизвикаа пожари и оштетувања на станбени згради, градинка, хотел, трговски центар, административни објекти и возила. Според извештаите на украинските служби вчера се повредени најмалку 18 лица, меѓу нив и 17-годишно момче. Две лица се во тешка состојба.
На фронтот, ситуацијата останува исклучително напната. Украинскиот Генералштаб соопшти дека само до вечерта на 30 април биле регистрирани 109 борбени судири, додека руските сили извршиле 51 воздушен напад, фрлиле 166 наведувани авио-бомби, употребиле илјадници камиказе-дронови и извршиле повеќе од 2.200 напади врз украински позиции и населени места. Најинтензивни борби се водат во правците Покровск, Костјантинивка, Хуљајполе, Купјанск и Лиман. Борбите продолжуваат и во текот на ноќта и утрото на 1 мај.
Претходниот ден, 29 април, украинските сили пријавија уште поголем број борбени судири – дури 177, вклучително и 41 напад во секторот Покровск, што покажува дека Русија ја одржува офанзивната динамика, но без јасен оперативен пробив.
Паралелно, Украина продолжува со удари длабоко во руската територија, особено врз енергетска и логистичка инфраструктура. Во последните денови украински дронови повторно го погодија рускиот пристанишен и нафтен комплекс во Туапсе, четврти пат во една недела, како дел од поширока стратегија за нарушување на руската воена економија.
Дипломатските извори на ЦИВИЛ укажуваат дека политичкиот контекст е подеднакво значаен. Русија предлага краткорочен прекин на огнот околу 9 мај, денот на воената парада во Москва. Претседателот Володимир Зеленски реагираше со скепса и јасна порака. Тој побара појаснување од американската страна за тоа дали рускиот предлог е вистинска иницијатива или само симболична пауза за потребите на московската парада.
Ги задолжив нашите претставници да стапат во контакт со тимот на Претседателот на САД и да ги утврдат деталите на руската предлог-иницијатива за краткорочен прекин на огнот. Украина се стреми кон мир и ја обезбедува неопходната дипломатска работа за реално завршување на оваа војна. Ќе се утврди за што конкретно станува збор: дали станува збор за неколку часа безбедност за парадата во Москва или за нешто повеќе. Нашиот предлог е долгорочен прекин на огнот, гарантирање сигурна безбедност за луѓето и траен мир. Украина е подготвена да работи за тоа во кој било достоинствен и ефективен формат.
Стратешки гледано, последните 48 часа покажуваат три паралелни процеси. Прво, Русија го нормализира масовниот воздушен терор како секојдневна форма на притисок врз Украина во која цивилите, нивните домови, установи и инфраструктура страдаат деноноќно. Второ, фронтот останува во фаза на тешка исцрпувачка војна, со голем број локални напади, но без стратешки пресврт. Трето, Москва ја злоупотребува дипломатијата за да добие тактичка пауза за безбедна воена парада, додека Кијив инсистира на реален, долгорочен и безбедносно гарантиран мир.
Во таа смисла, руската понуда за краток прекин на огнот не може да се гледа одвоено од ноќта во која над 200 дронови и ракети беа насочени кон Украина. Токму тука е суштината на украинската позиција: мир не може да биде церемонијален гест за веона парада, туку мора да биде механизам што навистина ги штити луѓето.
Извор: ЦивилМедиа.мк