Украинскиот Претседател Виктор Јануковиќ ги започнува разговорите со тројцата поранешни претседатели Леонид Кравчук, Леонид Кучма и Виктор Јушченко.
Во Киев, во рамките на напорите за смирување на политичката криза во Украина, се очекува да пристигне и шефот за надворешна политика на ЕУ, Кетрин Ештон.
Стотици демонстранти и натаму се на плоштадот на независноста во Киев поради одбивањето на украинските власти да го потпишат договорот за асоцијација со ЕУ.
Украинскиот опозиционен лидер и поранешен боксерски шампион Виталиј Кличко рече дека Украина сака да стане европска земја и дека целиот систем треба да се промени.
Во интервју за Дојче веле, Кличко кој има централна улога во протестите против власта после одбивањето на претседателот Виктор Јануковиќ да го потпише договорот за придружување кон ЕУ, рече дека целиот систем во земјата мора да се промени и да се спроведат проевропски реформи.
Тој укажува на полициската бруталност кон демонстрантите кој предизвика бес кај граѓаните.
„Специјалните полициски единици во четири часот наутро брутално ги тепаа студентите и таа бруталност ја крена целата земја на нозе. Сите се разочарани поради начинот на кој Јануковиќ ја користи својата моќ спрема луѓето“, рекол Кличко.
Покрај повредените студенти, Кличко посочува дека биле повредени над 40 новинари, а 13 млади луѓе биле уапсени и осудени на најмалку два месеци затвор.
„Ние сме цврсто уверени дека Јануковиќ мора да сноси одговорност или да каже кој е одговорен“, вели Кличко и додава дека демонстрантите бараат оставка од владата и премиерот Никола Азаров, како и од министерот за внатрешни работи зашто тој е шеф на полициските сили и ослободување на сите демонстранти кои се политички затвореници.