Препораки за исхраната според заболувањето, за прехранбените потреби, како и контрола, а со цел побрзо оздравување ќе добиваат пациентите во Кабинетот за клиничка исхрана.
Во Кабинетот за клиничка исхрана, кој првпат се отвори во Република Македонија, совети ќе добиваат пациентите кои треба да добиваат артефициална исхрана (ентерална или парентерална), која подразбира внесување хранливи материи преку дигестивниот систем. Станува збор за пациенти со кронова болест, со карцином, пациенти со синдром на кратко црево, деца со анорексија и сите оние кои имаат потреба од вештачки начин на исхрана.
Клиниката со средства од Фондот за здравствено осигурување набави нови ендоскопски капсули преку кои ќе се следат заболувањата на тенкото црево, што е многу значајно особено во делот на рано откривање на повеќе болести и превенција, велат на Клиниката за гастроентерохепатологија.
„ Работиме успешно на подобрување на услугите и условите за работа и ги зајакнуваме капацитетите со соработка со други клиники и болници во делот на исхрана и клиничка потхранетост“, изјави директорката на Клиниката, Калина Гривчева Старделова.
Министерот за здравство Венко Филипче, истакна дека се обврзани заедно со СЗО и ги преземаат сите мерки за да ја промовираат здравата исхрана не само за пациентите, туку и за целокупното население.
Во врска со ендоскопските капсули рече дека со нив ќе се олесни дијагностицирањето на многу болести кои ќе се откриваат во рана фаза кога можат дури и целосно да се излекуваат.
„Министерството за здравство ќе продолжи и натаму во соработка со ФЗОМ да ги поддржува сите нови методи кои можат да се имплементираат на клиниките со цел да се подобри пристапот до здравствените установи и да се подигне квалитетот на здравствената услуг“, рече Филипче.
Одговарајќи на новинарско прашање Гривчева Старделова потенцира дека на сите пациенти кои ќе бидат хоспитализирани на Клиниката ќе им бидат направени соодветни мерења за да им се одреди нивниот нутритивен статус и при одење од Клиниката ќе се повторат мерењата за да се утврди колку болеста е таа што ја предизвикува потхранетоста на пациентите и колку пациентите внеле храна според препораката што им е дадена.
„Ќе понудиме на сите болници кои имаат потреба од ваков тип контроли, исхрана на пациентите кои не можат да се хранат доволно, за да им понудиме наш совет и заедно да ги контролираме. Имаме четворица пациенти со синдром на кратко црево кои имаат потреба од ваков тип на исхрана“, рече Гривчева Старделова и додаде дека во проекција е да се набават 25 ендоскопски капсули годишно, а ако се укаже потреба ќе бидат набавени и повеќе.
Една капсула чини околу 700 евра, а парите се обезбедени од ФЗОМ. Клиниката работела на оваа проблематика од 2012 до 2015 година, кога застарел софтверот. Лекарите се задоволни што сега повторно ќе можат да им овозможат грижа на своите пациенти. Тие велат дека пациентите кои не можат да се хранат нормално поради одредена болест, со ваков тип на исхрана може да живеат со години. Храната може да се зема со голтање, но и со внесување на друг начин со сонда во организмот.
Засега ваков тип на исхрана ќе добиваат само лежечките пациенти, на товар на ФЗОМ, а лекарите се надеваат дека понатаму ќе се најде долгорочно решение за исхраната да биде покриена од државата и во домашни услови.