Романот „Птиците од ланските гнезда“ од Митко Маџунков во издание на „Три“, е годинашен добитник на наградата „Роман на годината“ на „Утрински весник“. Од 46-те романи кои пристигнaле во редакцијата на весникот да се натпреваруваат за оваа книжевна награда, по пет селекции, жири-комисијата по пат на тајно гласање одлучи годинава наградата да ја понесе најновиот роман на Митко Маџунков.
„Чувството да се добие оваа престижна награда е многу добро. Сметам дека во оваа ситуација наша, кога литературата е малку присутна во медиумите, кога нема соодветна рецепција и критичка мисла, речиси нема никаде рецензии, овој потфат на ’Утрински весник‘ е многу важен за афирмацијата на нашата култура воопшто, не само на македонскиот роман. На тоа треба да се истрае и целиот процес уште повеќе да се афирмира, со поголема присутност на авторите, со притискање за критички осврти итн. Мислам дека е тоа поентата. Бидејќи, романот како една сложена структура, меѓудругото, е и во функција на одбрана на јазикот, на неговата висока артикулација, а тоа е нешто што не’ засега сите нас“, вели лауреатот Митко Маџунков.
Во образложението за наградата, жири-комисијата во состав: Елизабета Шелева, претседател, Снежана Младеновска-Ангелков, Ефтим Клетников, Коле Манев и Катерина Богоева, членови, се вели дека романот „Птиците од ланските гнезда“ од Митко Маџунков се издвојува од преостанатите романескни дела, според својата исклучително умешна, маестрално срочена композиција, во која се откриваат најдобрите карактеристики на полифонискиот роман.
Инаку, за годинашното издание за „Роман на годината“ конкурираа 46 романи, што укажува на фактот дека во Македонија има богата романескна продукција, или како што ќе каже жири-комисијата, се јавува една романескна скриптоманија.
Покровител на наградата „Роман на годината“ на „Утрински весник“, која изнесува 150.000 денари, е „Т-мобиле“.