Маргинализираните граѓани најмногу се погодени од полициската бруталност и дискриминацијата во здравствените установи, констатира „Коалиција Маргини“ во годишниот извештај за „Сексуални и здравствени права на маргинилизираните заедници“ .
Андреј Сених од „Маргини“ посочи дека во текот на 2017 година се документирани 20 случаи на прекршување на правата на лица што употребуваат дроги.
Тој нагласи дека продолжува дискриминаторската практика на ЈЗУ Стоматолошка клиника кон луѓето што употребуваат дроги и кон луѓето што живеат со ХИВ, потенцирајќи дека полициската бруталност, нечовечкото и деградирачко однесување постојано се забележуваат кај лицата кои употребуваат дроги.
Драгана Дрндаревска наведе дека се документирани 21 случај во кој како жртва се јавуваат сексуални работници за насилство, закани, ограбување и силување на сексуални работници од страна на клиенти, насилство, физички напад, навреди, закани и ограбувања на сексуални работници од страна на трети лица, како и повреда на правата директно од страна на полициски службеници.
– Коалицијата „Маргини“ повторно апелира до ОЈО и до МВР во најбрз можен рок да ги откријат и да ги изведат пред правдата сите сторители на кривични дела од омраза врз основа на сексуална ориентација и родов идентитет со цел да се обесхрабрат хомофобичните насилници и да се охрабрат жртвите да пријавуваат насилство мотивирано од омраза, рече Дрндаревска, посочувајќи дека во 2017 година се документирани 22 случаи на прекршување на правата на ЛГБТ заедницата.