Димитар Ковачевски, лидерот на СДСМ заедно со премиерот Зоран Заев, попладнево одржуваат поединечни средби со претставници на коалициските партнери на кои како што дознаваме се разговарало за програмските политики на новата влада во очекување на мандатарoт.
Во тек се разговори со лидерот на Демократскиот сојуз Павле Трајанов и Зоран Димитровски, заменик министер за локална самоуправа и генерален секретар на партијата. Претходно беше остварена средба и со лидерот на НСДП Тито Петковски.
ЛДП информира дека претседателот Горан Милевски, потпретседателите Моника Зајкова, Игор Велјановски и генералниот сектретар Боби Мојсоски, на средба со Ковачевски, генералниот секретар Љупчо Николовски и премиерот Заев договориле детали важни за либералдемократите во делот на економијата, екологијата и изборните реформи.
– Усвоени се нашите барања кои ќе ги афирмираат нашите либерални политики, а тоа се заокружување на процесот на децентрализација, отворање на Законот за локална самоуправа, воведување на моделот на една изборна единица, отворени листи за избор на советници, регулацијата на пазарот на криптовалути, измени во законите за градење и урбанистичко планирање со цел стопирање на урбаниот хаос во градските центри и ставање акцент на хуманото живеење и екологијата. Изградба на нова жичарница на Пелистер и развој на зимскиот туризам – велат од ЛДП, партија која како што информира не отстапува од заложбите на политиката на рамен данок и укинување на давачките кои се неданочни обврски за граѓаните.
С.М.