Aвстрискиот ансамбл „Реконсил Виена“, вечерва во 20 часот, ќе одржи концерт во Музејот на град Скопје како дел од програмата на годинашните Денови на македонска музика.
Диригент на концерт е Роланд Фрајзицер. На програмата се дела од Горан Начевски, Валентина Велковска-Трајановска, Панде Шахов, Александар Пејовски, Роланд Фрајзицер, Јулија Пургина, Томас Хајнрих и Јајме Волфсон.
Ансамблот во 2002 година го формирале Александер Вагендристел, Роланд Фрајзицер и Томас Хајниш и денес е признаен како еден од водечките австриски ансамбли за современа музика.
Утревечер во 20 часот во Македонската опера и балет ќе настапат Никола Kоџабашија и групата „Пенелопе Х“, кои ќе изведат сценски етиди и песни.
Ќе настапат Никола Коџабашија – композитор/пијано, Гоце Јовановски – контрабас, Пеце Трајановски – хармоника, Бранислав Николов – перкусии, Гоце Стевковски – тапани и Емин Џијан – хорна.
„Пенелопе Х“ е независен отворен проект на малку невообичаена група музичари, кој произлезе како резултат на нивната заемна потреба да споделуваат креативни искуства. Така и дошло до првата соработка – снимањето на песнарката од истоимениот мјузикл инспириран од Хомеровата „Одисеја“. По оркестарската и постпродукциската обработка во Лондон, која траела 16 месеци, овој своевиден албум доживеа меѓународно дигитално издание во април 2011 година. „Пенелопе Х“ беше исто така промовиран во рамките на Лондонскиот џез-фестивал.