По сите полемики за правниот, политичкиот, естетскиот, урбанистичкиот или еколошкиот аспект на проектот Скопје 2014, откако 4 години се држеа во строга тајност хонорарите на уметниците што го израбтија, се отвора и прашањето на оправаданоста на нивните хонорари.
Фанатастичните суми потрошени за изработка на скулптурите и спомениците од овој владин проект укажува на фактот дека сега во Македонија живеат најбогатите скулптори во овој дел на светот. Ако на тоа се пресметаат и хонорарите на сликарите што ги изработија сликите и портретите во Музејот на македонска борба и во Стариот театар, на богатите скулптури им се придружуваат и богати сликари, кои беа засилени со автори од Русија и Украина кои ги изработуваа сликите на масовни сцени во Музејот на македонска борба.
Со тврдењето дека македонските уметници се збогатиле, во услови на сиромаштија што владее во државата, не се согласува скулпторот Жарко Башески, автор на спомениците на Даме Груев и Гоце Делчев, од проектот Скопје 2014. Според него, во некоја друга западноевропска земја, авторите би зеле неколку пати поголем хонорар. Со ангажманот на домашните автори на проектот Скопје 2014, се менува позицијата на уметниците кај нас и вреднувањето на нивниот труд.
Кои се најплатените скулптори во Македонија? Според достапните информации од Министерство за култура и општина Центар – тоа без конкуренција е Валентина Стефановска.
И покрај објавените суми на чинење за спомениите и скулптурите од Скопје 2014 за дел од спомениците нема податок колку изнесувал авторскиот хонорар, без трошоците на изработка.
Додека пак кај оние скулптури кои биле финансирани преку општина Центар, освен за Стефановска, може да се види висината на авторските хонорари.
Вкупната сума досега потрошена за владиниот проект Скопје 2014, со кој сосема се промени личниот опис на центарот на Скопје, е речиси 208 милиони евра, а според најавите за изградба на нови објекти, овој проект се уште не е завршен.
Инаку, за досега највисоко проценета скулптура во светот, според аукциската куќа „Сотби“, се смета скулптурата L’Homme qui marche од Алберто Ѓакомети, која е проценета на 104, 3 милиони долари.