Освен што се врати на на врвот на топ листите, Дејвид Боуви има уште една причина за славје – неговата изложба што ќе се отвори на 23 март во Лондон, најверојатно ќе биде попосетена отколку поставката на Леонардо да Винчи
Големата изложба во музејот „Викторија и Алберт“ во Лондон, насловена „Дејвид Боуви е“ најверојатно ќе ги собори рекордите на посетеност на изложбите на такви великани како Веласкез или Леонардо да Винчи. Уште пред отворањето се продадени над 42.000 билети.
На влезот на музејот посетителите ќе ги дочека четириминутно видео на кое е прикажан Боуви на 17 годишна возраст како талка по улиците на Сохо во Лондон. Оваа досега непозната аматерска снимка била направена со Супер 8 камера, но добро се гледа дека уште од тогаш Боуви одел и се смеел како некое рокенрол божество.
Поставката што ја направиле кураторите Викторија Брокс и Џефри Марш содржи повеќе од триста предмети кои за прв пат се најдоа на исто место. Така, посетителите ќе може да ги видат оригиналналните ракописи од неговите песни, костимите кои ја обележаа современата поп-култура фотографии, филмови, инструменти и генијалните видеа на Боуви.
Изложбата „Дејвид Боуви е …“ ќе биде отворена од 23 март до 11 август, а директорот на музејот „Викторија и Алберт“, Мартин Рот изјави дека за оваа „вистинска рок икона“ нормално е да се очекува голем интерес од публиката.
Освен оригиналните експонати, многу внимание несомнено ќе привлечат дополнителните програми и сувенирите кои се подготвени со месеци однапред.
Се уште не е официјално потврдено присуството на самиот Боуви на отворањето на изложбата, но од управата на музејот изјавуваат за британските медиуми, дека и не е толку важно ако тој не се појави, бидејќи со неговото враќање на музичката сцена тој направил повеќе од доволно за промовирање на изложбата.
Точно на неговиот 66. роденден во јануари, Боуви ја објави својата нова песна „Where we are now“ прва по десет години пауза. Неодамна го објави и вториот сингл, песната „Stars (Are Out Tonight)“, а неговиот албум „The Next Day“ веднаш по појавувањето го зазеде првото место на британската топ листа на најдобро продавани албуми.