Со 10 гласови за и 7 против, Комисијата за уставни прашања го усвои заклучокот Собранието да го поддржи предлогот на Владата за уставни измени и Собранието да донесе одлука за пристапување кон измена на Уставот. Со третиот заклучок, Собранието и наложи на Владата во рок од 15 дена да подготви нацрт текст на уставни амандмани.

Собраниската седница е закажана за во понеделник и за да се усвои одлуката за пристапување кон измени на Уставот ќе биде потребно двотретинско мнозинство. „За“ гласаа пратениците од парламентарното мнозинство, а „против“ беа пратениците од опозицијата, членови на комисијата.

Со тоа заврши дебатата за уставните измени во Комисијата за уставни прашања која траеше два дена, пратениците на ВМРО ДПМНЕ останаа на своите позиции дека нема да гласаат за уставни измени и за промена на уставното име.Министерот за надворешни работи Никола Димитров кој зборуваше последен ги повика сите пратеници да размислат дали сакаат да ја втурнат земјава во голема неизвеснот и да ја остават надвор од НАТО и од ЕУ.

„Ова прашање е поголемо од нашите кариери, и од овој пратенички состав – дали можеме да замислиме каде ќе биде Македонија ако се прифати или отфрли Договорот. Ова прашање ја влече Македонија надолу. Долго време мислевме дека можеме да го зобиколиме ова прашање , но нема таков пат. Единствен начин е да бидеме пријатели со Грција“ кажа Димитров.

Димитров надополни дека досега ниту еден документ не бил објавен на македонски јазик, туку се користела формулацијата„ јазик на ФИРОМ“. Ова го потврдил и Груевски кој рекол дека Грција никогаш нема да  прифати македонски јазик и македоснки идентитет.

„Факт е дека со овој Договор влегуваме во НАТО како Македонци и ја пробиваме пречката да ги отвориме пристапните преговори со ЕУ “, кажа Димитров.

-Што ни дава надеж за подобар договор? За грчката опозиција подобар договор значи да не се признава македонски јазик и идентитет, а тоа значи дека немаме договор. Што ни дава надеж да се надеваме дека НАТО повторно ќе ги отвори вратите за нас“, праша Димитров.

На Димитров му реплицираше пратеникот на ВМРО ДПМНЕ Илија Димовски кој рече дека власта излегла од својот мандат кога преговарала за уставното име.

„Во 2008 беше донесена изгласана декларацијата за црвените линии со која се обврзавме дека ќе го зачуваме устваното име, јазик, идентитет. Тоа е патот по кој треба да се движи Македонија, а вие излеговте од овој мандат“, реплицираше Димовски. На ова Димитров одговори: „Прашањето за името вие го однесовте на неповолен терен- со антиката“.

Претходно, премиерот Заев рече дека има околу 25 пратеници од ВМРО ДПМНЕ кои се свесни и сакаат да понесат одговорност. Ова го демантираше пратеникот Димитар Стевананџија кој рече дека ниту еден пратеник од неговата партија нема да гласа за уставни измени.

-Ве демантирам – ниту еден пратеник од ВМРО ДПМНЕ нема да гласа, рече тој, додавајќи дека подобро да има избори и да се изгубат неколку месеци отколку да се изгуби како што рече ,,уставното, библиско име на државата“.

Дебатата во собраниската комисија за уставни прашања не одговори на дилемата дали има 80 пратеници кои се подготвени да гласаат за да се отвори процесот за уставни измени. Пратениците од ВМРО ДПМНЕ кои говореа на комисијата и се изјаснија дека нема да гласаат за уставни измени се повикуваа на резулатите од референдумот кој според нив бил неуспешен и тие требало да ја следат волјата на 1 200 000 глсачаи кои не гласале. Од парламентарното мнозинство ги повикаа да гласаат според сопствена совест затоа што влезот во НАТО и ЕУ е отворен само преку усвојување на  Договорот со Грција која за првпат го признава македонскиот идентитет и јазик.