Лекарите од Комисијата за заразни болести наместо денеска ќе се состанат утре за да ја разгледаат епидемиолошката состојба во Северна Македонија.
НоваТВ од извори во Комисијата дознава дека наместо во вторник во 10 часот како што беше до сега, членовите на Комисијата почнувајќи од утре состаноци ќе имаат секоја среда на пладне.
Минатата недела, на состанокот на Комисијата за заразни болести беше донесена одлука до Владата да се препорача укинување на мерките за излез од државата, односно неопходниот негативен ПЦР тест или потврда за вакцинација или прележан вирус. Истовремено беше договорено да се препорача укинување на мерката бремените жени да бидат ослободени од работа.
„Според членовите на Комисијата во моментов е безбедно за бремените жени да се вратат на работа, но со препорака тие да се вакцинираат против Ковид- 19 бидејќи вакцината е безбедна“, рече портпаролот на Комисијата, доктор Злате Мехмедовиќ, веднаш по минатонеделникот состанок.
Комисијата за заразни болести на еден од последните состаноци исто така препорача сетрификатот за прележан Ковид-19, наместо 45 дена да трае 180 дена. Оваа препорака се уште чека одобрување од Владата.
Инаку, министерот за зравство Беким Сали вчера изјави дека продолжува трендот на намалување на бројот на активни ковид случаи, поради што надлежните очекуваат во наредниот период да се стабилизира епидемиолошката ситуација во државата.
„Бројките на новозаразени секојдневно се следат и сега се наоѓаме во фаза на смирување на четвртиот бран. Дали Комисијата за заразни болести ќе предложи дополнително намалување на мерките, зависи од епидемиолошката состојба коај ќе се анализира на следниот состанок“, рече Сали и додаде дека поради малиот процент на заразени ученици, скринингот во основните училишта ќе биде прекинат.
Според последниот извештај на Институтот за јавно здравје, минатата недела регистрирани сe 3.702 нови позитивни случаи, што е намалување од 39,5 проценти во однос на претходната седмица.
(Б.Б.)