Советот на ЕУ го поздравува одржувањето на интеграцијата во Европската Унија како стратешка цел на Северна Македонија и ја повикува земјата да ги интензивира напорите за унапредување на реформите поврзани со пристапувањето кон Унијата.
Ова се наведува во делот посветен на земјава во Предлог-заклучоците на Советот на ЕУ за проширувањето, кои откако не беа усвоени на вчерашното заседание на Советот за општи работи поради противење на Унгарија на делот за Украина, Данска во својство на актуелен претседавач со Унијата ги објави како „Заклучоци на Данското претседателство за проширувањето“.
Советот на останува посветен на понатамошен напредок на постепената интеграција на Северна Македонија во внатрешниот пазар на ЕУ, врз основа, меѓу другото, на засилено спроведување на Спогодбата за стабилизација и асоцијација. Советот го поздравува тековното спроведување на Планот за раст за Западниот Балкан во Северна Македонија, кој е на добар пат да им донесе конкретни придобивки на граѓаните. Позитивно се земаат предвид и првите две исплати во рамките на Механизмот за реформи и раст и се охрабрува Северна Македонија да продолжи со спроведувањето на својата Реформска агенда, се наведува во документот.
Во него се нагласува дека добрососедските односи и регионалната соработка остануваат суштински елементи на процесот на проширување и се потсетува на важноста од постигнувањето на видливи резултати и од „спроведувањето со добра волја на билатералните договори, вклучувајќи ги и Преспанскиот договор со Грција и Договорот за пријателство, добрососедство и соработка со Бугарија, во согласност со Преговорачката рамка“.
Советот силно ја пофалува Северна Македонија за нејзината доследна соработка по прашања од надворешната политика и нејзиното цврсто и долгогодишно целосно усогласување со заедничката надворешна и безбедносна политика на ЕУ, вклучително и во однос на рестриктивните мерки, како јасен сигнал за стратешката посветеност на Северна Македонија на нејзиниот пат кон ЕУ. Советот, исто така, го поздравува континуираното активно учество на Северна Македонија во мисиите и операциите на ЕУ во рамките на заедничката безбедосна и одбранбена политика и подготвеноста за подобрување на соработката во рамките на Партнерството за безбедност и одбрана со ЕУ, се додава во заклучоците.
Во текстот се забележува дека земјава сè уште не ги спровела уставните измени, на кои се обврзала и се потврдува подготвеноста на Советот за свикување на втората меѓувладина конференција, без понатамошни одложувања или дополнителни политички одлуки, штом ќе биде извршена измена на Уставот и за „отворање на преговарачкиот Кластер 1 што е можно поскоро во согласност со Преговорачката рамка“.
Во заклучоците се наведува дека се потребни брзи и решителни акции со цел земјата да ги исполни критериумите од Кластерот 1 – Основи вредности, како и да ги интензивира напорите за спроведување на реформите, пред сè во областа на владеењето на правото, заштитата на независноста и интегритетот на судството и зајакнување на борбата против корупцијата и организираниот криминал.
Советот ја повикува Северна Македонија да усвои нов Кривичен законик во согласност со законодавството на ЕУ и меѓународните стандарди. Советот забележува дека е постигнат одреден напредок во областа на реформата на јавната администрација и ја охрабрува Северна Македонија да ги интензивира своите напори во врска со модернизацијата на јавната администрација и обезбедувањето на потребниот административен капацитет. Советот ги зема предвид информациите дадени од Комисијата за неодамнешниот постигнат напредок и ги охрабрува властите на Северна Македонија да ја подготват и финализираат на инклузивен начин работата на сите три патокази за функционирање на демократските институции, реформата на јавната администрација и поглавјата за владеење на правото, како и на акцискиот план посветен на заштитата на правата на лицата кои припаѓаат на малцинства или заедници, се додава во текстот.
Во заклучоците се повикува на понатамошно зајакнување на основните права, слободата на медиумите и слободата на изразување и се поздравуваат неодамнешните локални избори, за кои се вели дека била „генерално конкурентни, иако со некои процедурални недостатоци“, при што се нагласува дека е потребна изборна реформа со вклучување на преостанатите препораки од ОБСЕ/ОДИХР и Венецијанската комисија.
Советот ја поздравува соработката во управувањето со границите меѓу Северна Македонија и Фронтекс. Советот ја повикува Северна Македонија да ги засили напорите за подобрување на системите и процедурите за прием на азил, се додава во документот.
Во однос на економските критериуми, се забележува доброто ниво на подготовка во развојот на функционалната пазарна економија и се охрабрува земјата да ги засили своите напори за зајакнување на својот капацитет за справување со конкурентскиот притисок и пазарните сили во рамките на ЕУ и да ги спроведе потребните структурни реформи.
Советот го поздравува неодамнешниот напредок во однос на железничката врска долж транспортниот Коридор 8, кој е од стратешко значење, и очекува ефикасно спроведување на преземените обврски, се додава во „Заклучоците на Данското претседателство за проширувањето“.