Во Македонија досега се излекувани 852 лица од коронавирусот, моментно се активни 572 случаја, а вкупниот број на починати е 82. Од 16.997 тестирања беа потврдени 1.506 позитивни случаи на ковид-19, а во меѓувреме, во Дебар, во Радовиш, во Гевгелија, во Струмица, во Пробиштип и во Демир Хисар, повеќе нема активни носители на болеста.
Вчера, Институтот за јавно здравје (ИЈЗ) регистрира 45 излекувани лица, еден починат и 15 нови пациенти со ковид-19. На Клиниката за инфективни болести и фебрилни состојби вчера за прв пат од почетокот на епидемијата, на дневно ниво, немаше прием на нови позитивни или сомнителни лица на ковид-19.
Намален е бројот и на тестирања, а како што посочи директорот на ИЈЗ, Шабан Мемеди, тоа се должи на бројот на земени брисеви, односно, како што појасни, „нема симптоми, нема епидемиолошки анкети, нема брисеви“.
„Од почетокот на епидемијата, во Дебар беше регистриран 51 случај, досега четири лица починаа, а 47 се оздравени. Во Радовиш и Гевгелија беа регистрирани по четири случаи, во Струмица два, во Пробиштип два, а во Демир Хисар еден позитивен случај на коронавирусот. Во овие градови не се регистрирани смртни случаи од ковид-19, а сите евидентирани ковид-позитивни се оздравени“, наведоа од Министерството за здравство.
Министерот за здравство, Венко Филипче вчера во интервју за Телма посочи дека сите предложени мерки биле димензионирани за заштита на здравјето на граѓаните. Во таа смисла, истиот терк на работа ќе продолжи и нагласи дека и идните предлози ќе бидат носени врз основа на стручни аргументи, анализа на бројот на пациенти, на новодијагностицирани, на бројот на пациенти кои ги има во болниците и на домашно лекување.
Според него, мерките се добро димензионирани за што показател е тоа што сега секој ден има сè помалку дијагностицирани пациенти, сè помалку пациенти кои се лекуваат и повеќе излекувани отколку активни случаи.