Кошаркарите на МЗТ Скопје го запишаа шестиот пораз во низа во АБА лигата. Цедевита, овојпат, беше подобра од македонскиот првак во Загреб со 77:65 во воведниот меч од десеттата рунда во регионалното натпреварување.
Предвесник на конечниот исход беше првата четвртина во која гостите од Скопје беа лимитирани на само осум поени пришто примија 24. Составот на Александар Тодоров успеа да намали за пет коша до полувремето, во третиот период уште за четири, но сили за неизвесна завршница и евентуален пресврт немаше.
Муса кај домашните и Павличевиќ кај МЗТ Скопје беа најефикасни на средбата со 18 поени. Двоцифрен број кошеви за Цедевита постигнаа уште Николс и Стипановиќ (15) и Укиќ (14,) ефект каков меѓу „металците“ имаше Спасоевиќ (14).
Тимот од СЦ „Јане Сандански“ е закован на дното на табелата во АБА конкуренцијата со биланс од две победи и осум порази. Последниот триумф го забележа на 16 октомври против Игокеа во Лакташи (108:99). Прилика за прекинување на лошата резултатска низа ќе биде дуелот со Морнар на домашен терен на 10 декември.