Американскиот кошаркар, Тори Томас (31 год., 180 см.), во престојната сезона доаѓа да игра за МЗТ Скопје Аеродром откако клубот со него потпиша едногодишен договор. Според информациите од клубот, станува збор за искусен плејмејкер, кој европската кариера ја почнал пред девет години, a досега има играно за 12 различни екипи. Македонија е десеттата земја на Стариот континент каде што Томас професионално ќе настапува, со оглед на тоа што претходно бил дел од екипи од Шведска (Акропол), Холандија (Ханзеваст капиталс и Матрикс меџик), Полска (Туров и Роса Радом), Русија (Спартак Приморје), Србија (Партизан), Италија (Скаволини), Турција (Алиага Петким), Франција (Ле Ман и Шоле) и Грција (Арис).

Во 2011 година, со просек од 14,4 поени, 4,2 скока и 5,7 асистенции беше прогласен за најкорисен играч (МВП) на првенството во оваа држава како член на Туров, додека лани беше најдобар крадливец на топки во грчкиот шампионат како играч на солунски Арис.

Томас е четвртиот кошаркар од САД кој летово потпиша договор со МЗТ Скопје Аеродром, по Џош Скот, Џеремаја Мејси и Ксавиер Темс. Тука се уште Шарлон Клоф, Ѓорѓи Дреновац, Урош Лучиќ, Јуре Лалиќ, Марко Симоновски, Љубомир Младеновски, Адем Мекиќ и Андреј Цветковски. „Металците“ за дваесетина дена со гостување против Црвена звезда ги почнуваат настапите во АБА-лигата, додека на 12 октомври против Уникаха во Малага ја имаат првата обврска во Еврокупот.