Косовски спортско-рекреативен авион со две седишта падна во Мавровското Езеро – пилотот и копилотот под медицински надзор во гостиварската болница

Две лица се хоспитализирани во гостиварската болница по пад на мал спортски авион во водите на Мавровското Езеро, информираа од СВР Тетово.

Според портпаролот на СВР Тетово, Фатмир Реџепи, денеска околу 12:35 часот било пријавено дека во близина на браната „Белички канал“ во Мавровско Езеро се урнал мал авион.

Од леталото на копното успеале да излезат двајца косовски државјани, Џ.П. (41) и Д.М. (64), кој го управувал авионот. Тие се здобиле со повреди и се пренесени во Медицинскиот центар во Гостивар, изјави Реџепи.

Полициски екипи од Полициското одделение Маврово веднаш излегле на терен. Во разговор со полицијата, пилотот Д.М. изјавил дека бил принуден да слета во езерото поради проблем со моторот.