Управата за извршување на санкции не дозволи осудените лица за „Диво Насеље“ да бидат посетени од заменикот министер за правда на Косово, Блерим Салиху. Салиху, како што информираат од Управата, може да го посети КПД Идризово, но не и осудени лица.
Од Управата за извршување на санкции информираат дека во согласност со член 199, став 1 и 2 од Законот за извршување на санкции, осудените лица-странски државјани кои издржуваат казна затвор во казнено- поправните установи во Р.С. Македонија, можат да бидат посетувани од конзуларен претставник сообразно со правилата на меѓународното право под услови на реципроцитет.
Конзуларниот претставник е должен претходно да ја најави и закаже посетата во установата во која лицето ја издржува казната затвор. Во случајот, Амбасадата на Република Косово се обратила со барање да му се овозможи на заменикот министер за правда на Република Косово да ги посети косовските државјани кои издржуваат казна затвор во КПД „Идризово“, а од слобода се лишени на 09.05.2015 година во Куманово. Согласно наведеното, Управата за извршување на санкции смета дека заменикот министер за правда не е конзуларен претставник на својата држава во Р.С. Македонија, туку е политички претставник на Р. Косово-именуван функционер кој не е истовремено овластен да е конзуларен претставник на Р.Косово за што треба да исполни посебни услови предвидени со меѓународното право. Од оваа причина, почитувајќи го законот, Управата за извршување на санкциите Ве известува дека не сме во можност да ја дозволиме бараната посета на осудените лица наведени погоре во текстот, се вели во соопштението од Управата за извршување на санкции.
Заменикот министер за правда на Косово, Блерим Салиху на 8 декември најави дека на 9 декември ќе го посети Скопје, како и затворот „Идризово“ и дека ќе оствари средба со раководството на установата, но потоа посетата беше одложена.
Во престрелка во мај во 2015 година во кумановската населба „Диво Насеље“, животот го загубија осум припадници на македонските безбедносни сили, а беа убиени и десет членови на вооружената група.
За настаните во „Диво насеље“ од февруари во 2016 година во Кривичниот суд се водеше судско рочиште против 29 лица кои се товарат за сторени кривични дела „терористичка организација” и „тероризам”. Сите 29 обвинети за кумановските случувања пред Судот се изјаснија дека не се чувствуваат виновни. Случајот подоцна се спои со „Молња“ во кој се водеше постапка против осум лица помагачи на вооружената група од „Диво насеље“, со што бројот на обвинети се зголеми на вкупно 37.
Основниот кривичен суд Скопје во ноември во 2017 година ја објави првостепената пресуда, а Апелација ја потврди во јули во 2019 година. Од 37 обвинети за „тероризам“ и „терористичка организација“, 33 лица беа осудени за делата (седум на доживотна казна затвор, а останатите 26 лица на казни затвор од 12 до 40 години), а за четири лица е донесена ослободителна пресуда.