На денешната седница на Советот на општина Струмица, градоначалникот Костадин Костадинов нагласил дека за струмичани нема да има покачени сметки за комунални услуги.
„Покачени сметки за комунални услуги за струмичани нема да има. Струмица нема да биде како Прилеп и други општини кои за 60 проценти ги покачија сметките за собирање смет. Граѓаните да бидат спокојни, јас, општина Струмица и општинските јавни претпријатија знаеме како да менаџираме и во услови на криза“, рекол Костадинов.
Тој дополнил и дека е сега време кога општината мора да застане на страната на граѓаните. „Нема да има покачени цени, ниту пак намален обем на работа. Сега е време кога општината мора да застане на страната на граѓаните. Струмица ќе претрпи финансиска штета, но истата нема да ја трпат граѓаните“, рекол градоначалникот.