Музиката ја има секој од нас во себе, но таа е и колективно чувство кое создава блискост, разбирање, допир без допир, изјави министерката за култура Бисера Костадиновска-Стојчевска на отворањето на Фестивалот на музика од светот во Битола, кој оваа година се одржува под мотото „Една сцена, звук на светот“.
Таа додаде дека музиката има благородна мисија и дека низ целиот 20. век таа извршила огромно влијание за надминување на границите и конфликтите, отвора дијалог, предупредуав и соопштува.
„Широкиот поглед на уметниците кои ги прекршуваат стиловите и стереотипите, му посочуваат на човештвото дека секогаш има нови решенија за ширење на хумани идеи. Тоа е причина плус уште повеќе да го цениме и вреднуваме вашиот труд и придонес за обединување“, истакна Костадиновска-Стојчевска.
Министерката нагласи дека поради тоа ќе продолжи поддршката за оваа мисија и визија со која светот станува подобро место за живеење и ветува подобро утре.