Според пратеникот на СДСМ, Мартин Костовски, борбата со корупцијата се покажува на дело со двата поранешни генерални секретари од минатиот состав предложени од Владата на СДСМ, а тоа се Драги Рашковски и Мухамед Зекири, коишто по основано сомнение е покренато обвинение и се во активни процеси пред правосудните органи. Тој во гостување на Алсат кажа дека такво нешто било незамисливо во периодот на владеење на ВМРО-ДПМНЕ, кога имало заштитени бели мечки, а сега веќе никој не е над законот и не е привилегиран.
„Заложба на сите правосудни реформи на Владата е ослободување на судството од политички притисоци, како и реформи во администрацијата, имавме и јавен избор на раководствата во Антикорупциската комисија и Комисијата за спречување дискриминација, тука требаше да се донесе и Закон за ветинг. Тоа не е само декларативна определба на власта. Предлог-законското решение ќе го добиеме после Нова година, па ќе имаат сите пратеници да го видат. На ова законско решение императив треба да биде системската корупција, а не да се дојде до политички реваншизам. Законот за ветинг треба да ги опфаќа сите актуелни и поранешни политичари, судии и обвинители, односно да се испита нивниот интегритет и нефункционалност. Оптимист сум дека средината на идната година ќе можеме да го донесе овој долгоочекуван Закон“, рече Костовски.