Без застанување продолжуваме со проектите за подобро и поубаво Скопје, ваков е насловот на интервјуто на градоначалникот на Скопје, Коце Трајановски, објавено во мај на порталот Скопје инфо.
Пред само два и пол месеци од трагедијата која го погоди главниот град и однесе над 20 жртви, таткото на градот изјавил дека очекува оваа 2016 година да биде подеднакво успешна како и минатата 2015 година.
„Нашите екипи работат во сите десет скопски општини, градиме нови водоводни, канализациски и атмосферски мрежи, се прошируваат улици и булевари, се градат кружни текови и фискултурни сали, се реконструираат велосипедски патеки и мостови…“, набројува во интервјуто Трајановски.
На прашањата кои проекти се предвидени во периодот кој следува, градоначалникот ги издвојува изградба на атмосферска канализација на улиците Џон Кенеди и Кемал Ататурк, како и за изградба на фекална канализација по должината на булеварот Партизански одреди, на потегот од булеварот 8.Септември до улицата Московска, како и други градежни зафати и реконструкции на улици низ Скопје.
Трајановски се пофалил дека во последниве неколку години активно работи на полето на енергетската ефикасност, како и гасификација на 4 средни училишта. А особено е горд што Скопје станало првата локална самоуправа во Македонија, која што набавила електроавтомобил и 5 електровелосипеди и 5 електроскутери за потребите на градската администрација. Градоначалникот нагласува и дека градската власт во последниве неколку години интензивно вложува во уредување и промоција на туристичките дестинации.
Денеска, на црниот ден за Скопје, кога животот досега го загубија 21 лице, а над 70 се повредени, Трајановски не чувствува никаква одговорност. За поплавата и невремето одговорноста ја префрли на природата, и како што рече врз Скопје била фрлена „водена бомба“. Според Трајановски, не постои канализациска
мрежа која би можела да ја издржи надојдената вода.
При синоќешната посета на реонот во Сингелиќ и Стајковци, каде што беше на терен да изврши увид од поплавите, Трајановски беше исвиркан и избркан од страна на локалното население. Зошто токму во Гази Баба, пред пет месеци Трајановски, заедно со градоначалникот на Гази Баба и лидерот на ВМРО-ДПМНЕ соопштија дека се завршени градежните работи за изградба на канализација и патишта.
Трајановски на чело на Скопје го тера својот втор мандат. За градоначалник беше избран во 2009 година, а потоа повторно победи во трката за градоначалник на локалните избори во 2013 година.