Во време на голема нестабилност, која е резултат на воената агресија на Русија врз Украина, како никогаш досега се јавува потребата Европа да биде обединета, силна и целосно подготвена да ги одбрани демократските вредности на чии темели е изградена. Ова го истакна премиерот Димитар Ковачевски при посетата на високиот претставник на ЕУ за надворешна политика и безбедност и потпретседател на Европската Комисија, Жосеп Борел.
„Северна Македонија, како членка на НАТО и земја-кандидат уште од првите денови на конфликтот ја постави својата позиција во линија на своите сојузници од ЕУ, САД и НАТО. Силно ја осудивме воената агресија на Русија врз Украина и ги активиравме санкциите кон Руската Федерација“, истакна претседателот на Владата на Северна Македонија Ковачевски.
Тој додаде дека денес сме сведоци на воена агресија во која веќе премногу недолжни луѓе, меѓу кои и деца ги изгубија своите животи и кога над 2.5 милиони Украинци се веќе бегалци и ги напуштиле своите домови.
„Во овој контекст, Европската Унија и сите земји членки треба да делуваат стратешки и храбро и да повикаат на интеграција на земјите од Западен Балкан во Европската Унија“, рече на прес-конференцијата премиерот Ковачевски и потенцираше дека единствено Европа која е целосно обединета може да е силна Европа.
Тој нагласи дека од исклучителна важност е Европската Унија и земјите членки максимално да се вклучат бидејќи проширувањето на ЕУ со земјите од Западен Балкан сега веќе е и стратешко и безбедносно прашање.
“Интеграцијата значи заедничка посветеност за изградба на силна, стабилна и обединета Европа, како дом на демократски и цивилизациски вредности и сили. Оставањето геостратегиска празнина во нашиот дел од Европа не е опција. Брзата интеграција на Северна Македонија и регионот ќе обезбеди стабилност, но и развој на Европа. Потребни ни се предвидливи, веродостојни, засилени и забрзани процеси на интеграција во ЕУ“, нагласи премиерот Ковачевски.
Ковачевски уште додаде дека Владата останува посветена на реформите и реформските процеси, врзани пред сѐ со владеењето на правото, борбата против корупцијата и демократското владеење, како и на работата за поскоро закрепнување од економската криза за којашто се очекува зајакната финансиска поддршка од Европската Унија, со што дополнително ќе се овозможи забрзана енергетската и дигиталната трансформација.
Високиот претставник на ЕУ за надворешна политика и безбедност и потпретседател на Европската Комисија Жосеп Борел, на прес-конференцијата истакна дека Република Северна Македонија се покажа како одговорен член на меѓународната заедница во придружувањето на осудата на воената агресија на Украина.
Тој дополни дека Северна Македонија и Западен Балкан останува во врвот на стратешките приоритети на ЕУ и дека тој и Европската Комисијата ќе направат сѐ што е неопходно членството на земјата во ЕУ да биде реалност колку што може поскоро.
Борел информираше дека Европската Комисија подготвува мерки од Европскиот инвестициски план за Западен Балкан за поддршка на енергетската диверзификација и намалување на зависноста, како соодветен одговор на економските последици со кои сите ние се соочуваме, а се предизвикани од војната.
до високиот претставник на ЕУ за надворешна политика и безбедност и потпретседател на Европската Комисија, Жосеп Борел, за неговата континуирана и цврста поддршка и лична заложба за Република Северна Македонија да добие датум за преговори без понатамошни одлагања и за иднината на Западен Балкан во Европската Унија упати на денешната средба премиерот Димитар Ковачевски.
Ковачевски го прими Борел, кој се наоѓа во работна посета на нашата земја и кој на средбата беше придружуван од шефот на делегацијата на ЕУ, амбасадорот Дејвид Гир.
Премиерот Ковачевски и потпретседателот на ЕК Борел имаа тет-а-тет средба по што следуваше билатералниот состанок на двете делегации, на која од наша страна присуствуваа заменик-претседателот во Владата задолжен за европски прашања Бојан Маричиќ и министерката за одбрана Славјанка Петровска.
На средбата беше уште еднаш осудена неиспровоцираната и неоправдана војна на Русија во Украина која предизвикува тектонски геополитички поместувања која бара од сите во Европа да дејствуваат во единство, цврсто и навремено.
За време на разговорот беше нагласено дека Владата, со поддршка на ЕУ, продолжува со реформите и нивната имплементација во борбата против корупцијата, владеењето на правото, дигитализацијата и зелената агенда.
Премиерот Ковачевски и високиот претставник на ЕУ за надворешна политика и безбедност и потпретседател на Европската Комисија Жосеп Борел, ја истакнаа потребата за брзо делување и за остварување на стратешкиот интерес и придобивка на ЕУ од проширувањето со Северна Македонија и другите земји од Западен Балкан како приоритет за европската безбедност.
Во таа насока беше поздравен и напредокот во разговорите меѓу Северна Македонија и Бугарија за изнаоѓање на достоинствена и победничка европска формула која би го деблокирала почетокот на пристапните преговори за Северна Македонија, а како посебно значајно соговорниците на средбата истакнаа дека билатералните прашања не треба да го усложнуваат процесот.