Започна средбата на претседателот на Владата Димитар Ковачевски со владината коалиција. На средбата се присутни лидерите од сите коалициони партнери на Владата.

Целта на денешната средба е да се потенцираат силните активности на Владата во насока на водењето на економските политики во земјава во услови на светска криза. Коалиционите партнери предвидено е да разговараат за мерките и поддршката за зголемување на стандардот на граѓаните во овој период на најголема економска криза како и политиките поврзани со евроинтеграциите.

На средбата уште еднаш ќе биде реафирмиран ставот за стратешките приоритети на државата, ќе се разговара за евроинтеграциските процеси и разговорите со Бугарија. Исто така Ковачевски потенцираше дека избори ќе има во редовниот термин во 2024 и дека не прифаќаат уцени од опозицијата.

Премиерот Димитар Ковачевски одговарајќи на новинарско прашање на денешната прес-конференција изјави дека Владата ќе функционира како и досега ефикасно и во услови на криза ќе се носат навремени мерки за граѓаните и компаниите.

„Владата во време на корона кризата донесе мерки во износ од 1,2 милијарди евра, пакети антикризни мерки. Јас бев тој кој тие антикризни мерки ги предлагаше како заменик-министер за финансии во Собранието. Овде има претседатели на партии кои се пратеници на Собранието и тие добро знаат дека јас таму бев деноноќно . И тогаш имаше блокади и тогаш кога се носеше пакетот антикризни мерки пратениците на опозицијата излегуваа надвор, гледаа дали има доволно пратеници од власта без да мислат на граѓаните. Уште минатата година донесовме мерки кои се однесуваа на намалување на ДДВ-то на електрична енергија и тие ги донесовме”, изјави премиерот Ковачевски.

Премиерот истакна дека и оваа година во март Владата донесе 26 антикризни мерки за справување со енергетската криза и кризата со зголемување на цените на енергенсите.