Премиерот Димитар Ковачевски, во интервју за МИА посочува дека решението во преговорите кои нашата земја ги води со Бугарија се засноваат на европски вредности, како и на принципи на меѓусебна почит меѓу политичарите, институциите во двете држави како и на зачувувањето на достоинството на граѓаните од двете земји.
Ковачевски во интервјуто вели дека повеќе пати потенцирал дека никогаш не се врзува со датуми туку со реални проекти и додава дека во преговорите на актуелните две влади има нова динамикаи нов процес кој се темели на иднината на двете земји.
„Јас јуни никогаш го немам спомнато и не се врзувам за датуми, затоа што треба да имаме решение кое се заснова прво на европски вредности и до кое што ќе се дојде низ комуникација, засновано на меѓусебна почит меѓу политичарите и меѓу институциите во двете држави како и зачувување на достоинството на граѓаните на двете држави“, истакнува премиерот.
„Само такво решение може да претставува добра основа за отпочнување на преговорите и градење на меѓусебна доверба на две соседни држави“, нагласува тој.
Ковачевски смета дека поддршката на граѓаните за ЕУ сѐ уште е на високо ниво, но неотпочнувањето на преговорите дава лош сигнал и тоа не само за нашата држава, туку за целиот регион. Тој предупредува дека постојат и трети држави кои не сакаат да ја видат СевернаМакедонија дел од Унијата.
„Неотпочнувањето на преговори со Република Северна Македонија дава лош сигнал, бидејќи ние веќе имаме четири позитивни извештаи од страна на Европската комисија за нашиот напредок кон ЕУ. Тоа дава лош сигнал како за нас така и за цел регион. Министерот за надворешни работи сподели тоа што беше дел од одредени истражувања, а тоа е дека поддршката за ЕУ е сѐ уште на исклучително високо ниво, над 68 проценти. Меѓутоа неисполнувањето на одржувањето на првата меѓувладина конференција го зголемува скептицизмот кај одредени групи, што е нормално во еден таков долг процес и не е добро. Постојат и трети држави коишто не сакаат да ја видат Северна Македонија како дел од ЕУ и коишто финансираат различни групи па и политички партии“, вели македонскиот премиер, додавајќи дека нашата земја е најновата членка на НАТО благодарение на тешките одлуки и дека сега е очигледно колку е значајно да се биде земја членка на НАТО.