Премиерот Димитар Ковачевски му нуди на лидерот на опозициската ВМРО-ДПМНЕ, Христијан Мицкоски да ја преземе и премиерската позиција во преодната Влада само за да се реализираат уставните измени, брифираа денеска владини извори, иако, како што претходно е договорено премиер во следната техничка Влада, треба да биде Албанец. Претходно и ДУИ во серија изјави во јавноста и понуди на опозициската партија ВМРО-ДПМНЕ премиерот да биде од нивните редови.
Изворите додаваат дека Ковачевски смета дека треба да остане на премиерската функција и до крај да го спроведе процесот на уставни измени, но во интерес на евроинтеграции, освен пет ресори е подготвен на Мицкоски да му ја отстапи и премиерската позиција во преодната Влада, кој потоа би го спровел процесот докрај.
Постојат концепциски и процедурални разлики меѓу СДСМ и ВМРО-ДПМНЕ во однос на уставните измени, но на лидерската средба немало разговор за содржината на истите, туку за роковите кога да се спроведат.
За Ковачевски,како што беше речено денес на брифингот, битна е брзината на спроведување со оглед на околностите и роковите, кои се поставени и од самата Европска Унија. За премеирот се што е надвор од преговарачката рамка не може да се одлучува на лидерска средба, туку за тоа е потребен консензус на сите 27 земји-членки на Унијата.
Еден од условите, кои ВМРО-ДПМНЕ го постави на минатонеделната лидерска средба е одложено дејство на уставните измени, меѓутоа во преговарачката рамка е наведено дека тие треба да се спроведат по завршувањето на скрининг процесот и се услов за одржување на втората меѓувладина конференција и отворање на кластерите. Во тој контекст Ковачевски, како што нагласуваат владини извори, смета дека треба да се искористи и наклонетоста на земите од ЕУ, имајќи ја предвид руската агресија врз Украина, за приклучување на Западен Балкан и проширување на ЕУ, што е заложба на високите официјални претставници на Унијата.
Процедурата за уставни измени е веќе почната и во моментов предлгогот е во Министерството за правда, а оттаму треба да биде доставен до Собранието. За уставни измени, ако се почне во овој момент се потребни минумум три и пол месеци, а како што брифираат владини извори очекувањата се дека процесот ќе трае неколку месеци, со оглед на тежината на одлуките и собраниските процедури кои се потребни, за истите да бидат изгласани.
Владини извори брифираат и дека целта на навремено спроведување на уставните измени, согласно преговарачката рамка е забрзување на процесот на преговори, од старт затворање на две поглавја, забрзување на евроинтеграцијата, а тоа пак овозможува поврзување со европските пазари, економски раст, повеќе инвестиции, извоз, нови работни места.
Задутре, како што најавуваат владини извори, две држави, една членка од ЕУ и една надвор од ЕУ ќе усвојат резолуции за поддршка на зачленувањето на Северна Македонија во ЕУ и за потврда на македонскиот јазик и идентитет. Една од државите, како што веќе објавија медумите е Германија, а втората се очекува да биде САД.
За Владата суштински е да продолжи дијалогот со опозицијата за обединување во однос на уставните измени. Владата ќе почека неколку дена ВМРО-ДПМНЕ да делегира свои претставници во работната група, иако засега нема расположение опозициската партија да учествува во работната група. Истите извори порачуваат дека секој пратеник не само што е припадник на партијата, туку е пред се претставник на народот, кој тежи повеќе од девет илјади гласови, па поради тоа секој поединечно треба да размисли за иднината на државата.
С.К.