„Ние толку често комуницираме со Еди и толку е тесна соработката помеѓу нашите министерства и институциите, меѓу нашите две земји, што јас навистина, имам чувство дека ние денес, тука сме сите како дома. И прекрасно е чувството, затоа што се сеќаваме сите, не толку одамна, целиот Балкан беше во заложништво на ретроградни политики“, рече Ковачевски на почетокот на заедничката владина седница со Албанија што се одржува денеска во Скопје.
Посакувајќи им добредојде на гостите тој додаде и дека билатералните односи помеѓу Северна Македонија и Албанија никогаш не биле подобри од денес. „На 19 јули, и двајцата во име на нашите две држави и граѓани ја имавме честа да ги чуеме зборовите ‘ги означувам преговорите за започнати’ кои ги изговори чешкиот министер за надворешни работи. Ние имаме иста цел – полноправно членство и на Северна Македонија и на Албанија во Европската Унија“, рече Ковачевски.
Премиерот пред албанските колеги порача и дека меѓудржавната и регионалната соработка е важна особено сега кога се води војна на европскиот континент. „Северна Македонија се постави јасно на линија на надворешната политика на ЕУ во однос на војната во Украина. Знам дека тоа го направи и Република Албанија. Заедно стоиме на страната на светскиот мир и ја одржуваме стабилноста на регионот“, нагласи тој.
„И Европската Унија конечно сфати дека и нејзин стратешки и безбедносен интерес е Западен Балкан да биде дел од Европа и дека сега е моментот да се осигура заокружувањето на европското семејство“, порача Ковачевски.
Македонскиот премиер додаде дека отворањето на преговорите и започнувањето на скринингот е огромен успех за сите нас. „За нас, за македонскиот идентитет и за македонскиот јазик, признанието од Европа беше многу важно. Преговорите беа мачни и тешки, но успеавме да ги задржиме нашите позиции и да го постигнеме она за кое се боревме, а тоа е да си го зачуваме македонскиот јазик и да го издигнеме на исто рамниште со останатите јазици на Европската Унија“, рече тој.
„Доказ за нашиот напор и исполнетото ветување пред граѓаните беше потпишувањето на Договорот за ФРОНТЕКС, како прв ваков договор на кој сме ставиле потпис заедно со сите останати 27 земји членки, на македонски јазик, без никакви додавки, фусноти или дообјаснувања“, подвлече Ковачевски.
Ова е втора меѓувладина седница во Скопје, по првата во Поградец. Ќе бидат потпишани повеќе меморандуми за соработка меѓу Македонија и Албанија, од кои позначајни се за снабдување со енергија и за патна поврзаност.
Како што нагласи Ковачевски на денешната меѓувладина седница, доказ за добрата соработка е и договорот за враќање на незаконски изнесени икони од нашата држава, за коишто, по завршената кривична постапка во Албанија, преку денешниот договор, ќе се започне со постапка за физичко враќање во државава.
С.К.