„Се согласувам, очекувањата на мнозинството граѓани е да имаме европска Македонија, тоа се очекувањата на сите луѓе кои што сакаат држава со подобар економски стандард, подобро владеење на право, помалку корупција, подобри услуги за граѓаните,“рече претседателот на СДСМ и носител на листа во ИЕ 1, Димитар Ковачевски на самиот почеток на дуелот со Христијан Мицкоски, претседател на ВМРО-ДПМНЕ и носител на ИЕ 1, во Канал 5 Телевизија, на прашањето за тоа дали е згрешен насловот на денешниот дуел „Дуел за Македонија“.
Ковачевски посочи дека тоа е суштината на една европска Македонија, како и дека претстои многу работаиако изминатиот период се направиле грешки, меѓутоа дека со напорна работа нема недостижна цел.
„Најпрвин сакам да ви се заблагодарам и на вас на поканата и можноста вечерва да имаме соочување со претседателот на ВМРО-ДПМНЕ. Вие знаете дека јас два месеци веќе не сум претседател на Владата и ние во текот на изминатите 7 години имавме можност да ја водиме владата, од тие 7 години 2 години јас бев премиер. Ќе ви откријам една мала тајна, во 2 изминатите месеци покрај многубројните партиски активности, конвенции и конференции, конгреси итн, секој ден наоѓав барем по еден час или два да бидам на скопските улици и скопските паркови за да слушнам што зборуваат граѓаните. И никој подобро од мене не знае што е она што граѓаните ги загрижува, што е она што граѓаните ги прави незадоволни. Пред се тука мислам на високите цени, на однесувањето на ДУИ и на дел од нивните функционери, на незадоволството од невладеењто на правото, од високата корупција и доколку некој е одговорен за тоа тогаш тоа сум јас, бидејќи јас 2 години ја предводев Владата и ако некој е одговорен за тоа во вашето студио тогаш тоа сум повторно јас.
Тој истакна и дека го загрижува фактот што дел од граѓаните се заморени од процесот на интегрирање на процесот на ЕУ, од неговото траење.
„Да бидам искрен и јас понекогаш го чувствувам тој замор, меѓутоа од друга страна не постои друга алтернатива за Северна Македонија да стане држава каква што ја посакуваат граѓаните, односно да бидат донесени позитивни промени. И ме радува фактот што најголемиот дел од граѓаните сакаат да ја видат Северна Македонија како дел од ЕУ. Ние како партија и јас како претседател на СДСМ докажавме дека со нас Македонија стана членка на НАТО, дека Македонија ги отпочна преговорите со ЕУ и доколку го добијам мандатот односно можноста уште еднаш да бидам претседател на владата тогаш можам да им ветам дека ќе работам ден и ноќ напорно за да го оствариме тоа што сите го очекуваат а тоа е Северна Македонија да стане земја членка на ЕУ. Не само заради членство, туку заради тоа што граѓаните сакаат да имаат држава со подобар економски стандард, со подобро образование, со подобро здравство, со подобро владеење на правото, со помалку корупција, односно држава по европски стандарди како што ја сакаат и како што ја заслужуваат,“порача Ковачевски пред стартот на дуелот.