Ковачевски се заблагодарил на поддршката што Италија како партнер и сојузник ја дава кон Северна Македонија.
„Новата Влада предводена од СДСМ ќе се посвети на справување со последиците од енергетската криза, зајакнување на економскиот стандард и неселективна борба против корупција“, истакнал претседателот на СДСМ и мандатар за состав на новата Влада, Димитар Ковачевски на денешната средба со амбасадорот на Италија во Република Северна Македонија, Андреа Силвестри.
„Ова се важни прашања за нашите граѓани, но и за нашиот интегративен процес кон ЕУ, затоа што преку структурните реформи, европските вредности ги носиме дома. Италија е силен поддржувач на Северна Македонија во процесот на нашето приклучување на ЕУ и сметаме на ваша силна и видлива поддршка и во иднина, со цел нашата држава да ги започне преговорите за членство во ЕУ, затоа со сето она што досега го постигнавме, заслужуваме прва меѓувладина конференција и отворање на првите поглавја“ порача претседателот Ковачевски.
Ковачевски се заблагодарил на поддршката што Италија како партнер и сојузник ја дава кон Северна Македонија особено во делот на реформскиот процес и процесот на интеграција на нашата земја во ЕУ и најави дека новата влада предводена од СДСМ ќе се посвети на реформите важни за евроинтегративниот процес и унапредување на квалитетот на живот на сите граѓани.
Амбасадорот Силвестри го поздравил напредокот во важните сектори што го постигна Северна Македонија во изминатите години, додавајќи дека Италија ќе продолжи да биде силен поддржувач и промотор на проширувањето на ЕУ и изрази уверување дека наскоро ќе се создадат услови Република Северна Македонија да ги започне преговорите за членство во Унијата.