Соработката со Бугарија е унапредена, дециден е премиерот Димитар Ковачевски.
Во одговор на новинарско прашање, при денешната посета на компанијата „Витаминка“ во Прилеп, Ковачевски рече дека по доаѓањето на двете нови влади и воспоставувањето нов начин на комуникација, соработката меѓу двете земји е унапредена. Тој најави и дека штом ќе има документ прифатлив за двете страни, ќе биде споделен со институциите и со јавноста.
Според премиерот Ковачевски, секогаш ќе постојат поединци кои сакаат тие односи да ги направат полоши, но македонската и бугарската влада се против тоа и сметаат дека треба да се соработува на сите полиња и во секоја сфера.
„Со Бугарија отворивме нов процес на разговори, нов начин на комуникација кој треба да ја зголеми довербата не само меѓу министрите, туку и меѓу општествата во целина. Се формираа работни групи кои веќе покажуваат резултати, се одржаа и научни конференции меѓу универзитетите, стопанските комори се среќаваат, а се згоемија и транспортните квоти. Соработката е унапредена во однос на периодот претходно. Односите се унапредени, официјалното ниво на комуникација е унапредено и е на ниво на европските вредности. Секогаш постојат поединци кои сакаат тие односи да ги направат полоши, но ние и бугарската влада сме против тоа. Треба да соработуваме на сите полиња“, истакна премиерот и потсети дека Бугарија помогна при евакуирањето на македонсите државјани од Украина.
Според Ковачевски, токму руската агресија врз Украина покажа дека Европа треба да биде обединета и силна, а тоа мора најпрво да се направи меѓу соседните земји.