„Член сум на СДСМ од 1994 година, од 1996 станувам член на Централен одбор на СДММ, а од 1998 година, по поразот станувам член на Централен одбор на сениорите и Извршен одбор на сениорите“ рече претседателот на СДСМ, Димитар Ковачевски во поткастот на Сител.
Тој додаде дека по доаѓањето на власт на СДСМ во 2002 година, имал понуди да работи во Министерството за економија, но одбил за да се фокусира на кариерата во приватниот сектор.
„За себе сметам дека успеав да изградам респектабилна кариера во компаниите во кои работев. Да тргнете од сектор за финансии и да дојдете до извршен директор во серизона корпорација“ рече Ковачевски.
Претседателот на СДСМ додаде дека во 2019 година станал советник на тогашниот генерален секретар на СДСМ, Љупчо Николовски и без паричен надоместок работел на воспоставување на аналитички центар и системски работи, а во 2020 година прифатил да биде заменик министер за финансии.
„Тоа беше вистински предизвик, што голем дел од политичарите би го одбиле бидејќи е многу работа, не толку експонирана, бранење закони. Но ми беше предизвик и прифатив“ рече Ковачевски.
Тој додаде дека тогаш видел како функционира државниот систем, а по оставката на поранешниот претседател на СДСМ, Зоран Заев, на демократски внатрепартиски избори е избран за претседател на партијата и подоцна за премиер.